- દરોડામાં 774 બોગસ રોયલ્ટી પાસ મળ્યા : 78.80 લાખનો મુદ્દામાલ જપ્ત
- મૃતક વ્યક્તિના નામે બોગસ રોયલ્ટી પાસનો ઉપયોગ કરી ૨૦૧૨થી સાયલા અને થાન પંથકની ગેરકાયદે ખાણોમાં ઉપયોગ થતો હતો
થાન : ચોટીલા ડેપ્યુટી કલેક્ટર અને થાન મામલતદારની સંયુક્ત ટીમે ગૂગલિયાણા ગામની 'કેશવ કોલ ઇન્ડસ્ટ્રીઝ' પર દરોડો પાડી મોટા કૌભાંડનો પર્દાફાશ કર્યો છે. મૃત વ્યક્તિના નામે બોગસ રોયલ્ટી પાસ બનાવી ગેરકાયદેસર કોલસાને કાયદેસર ઠેરવવાનું નેટવર્ક વર્ષોથી ચાલતું હોવાનું બહાર આવ્યું છે. તંત્રની ટીમે સ્થળ પરથી લોડર, જેસીબી, ડમ્પર, ક્રશર પ્લાન્ટ અને કાર્બોસેલનો મોટો જથ્થો મળી રૂ.૭૮.૮૦ લાખનો મુદ્દામાલ જપ્ત કરી બંને સંચાલકો સામે કાર્યવાહી કરવામાં આવી રહી છે.
ચોટીલા ડેપ્યુટી કલેક્ટર એચ.ટી. મકવાણા અને થાન મામલતદારની ટીમે ગૂગલિયાણા ગામે આવેલી 'કેશવ કોલ ઇન્ડસ્ટ્રીઝ' પર સરપ્રાઈઝ ચેકિંગ હાથ ધરતા હસમુખભાઈ કલ્યાણભાઈ સચદેવના નામે ઇસ્યુ થયેલા ૭૭૪ રોયલ્ટી પાસનો ઉપયોગ થતો હતો. તપાસ દરમિયાન માલુમ પડયું કે, હસમુખભાઈનું મૃત્યુ વર્ષ ૨૦૧૨માં જ થઈ ચૂક્યું છે, તેમ છતાં તેમના નામે હજુ પણ પાસ ઇસ્યુ કરીને ખનીજ ચોરીને કાયદેસરનું રૂપ આપવામાં આવતું હતું.
રેઇડ દરમિયાન તંત્રએ સ્થળ પરથી લોડર, જેસીબી, ડમ્પર, ક્રશર પ્લાન્ટ અને કાર્બોસેલનો મોટો જથ્થો મળી કુલ રૂ.૭૮.૮૦ લાખનો મુદ્દામાલ કબજે કર્યો છે. તપાસમાં ખૂલ્યું છે કે, કેશવ કોલ ઇન્ડસ્ટ્રીના માલિકો કૌશિકભાઈ ઘનશ્યામભાઈ જાદવ અને રાકેશભાઈ જાદવ દ્વારા છેલ્લા પાંચ વર્ષથી આ કૌભાંડ ચલાવી સરકારી તિજોરીને મોટું નુકસાન પહોંચાડવામાં આવતું હતું. સાયલા તાલુકાના ચોરવીરા, ઈશ્વરિયા અને ચિત્રલાખા જેવા વિસ્તારોની ગેરકાયદેસર ખાણોમાંથી કોલસો કાઢી, આ બોગસ પાસના આધારે તેને વેચવામાં આવતો હતો. હાલમાં ખાણ-ખનીજ ધારા હેઠળ બંને માલિકો સામે ગુનો નોંધી વસૂલાત અને કાયદેસરની કાર્યવાહી કરવામાં આવી છે.
આરોપીઓ સામે આકરી કાર્યવાહી થશે
સાયલા અને થાન પંથકની ગેરકાયદેસર ખાણોમાં આ રોયલ્ટી પાસનો ઉપયોગ થતો હતો. ખોટા દસ્તાવેજો બનાવી સરકારી આવકને નુકસાન પહોંચાડનાર તત્વો સામે કડક કલમો હેઠળ કાર્યવાહી કરવામાં આવી છે. - એચ.ટી. મકવાણા (ડેપ્યુટી કલેક્ટર, ચોટીલા)
