Mera Gaon Mera Desh Movie fact : 1971ની એ સાલ હતી જેમાં 6.2 કરોડના બોક્સ ઓફિસ કલેક્શન સાથે બોલિવુડની એ સમયની બીજા નંબરની રેકોર્ડ બ્રેક ફિલ્મ ‘મેરા ગાંવ મેરા દેશ’ના લોકેશન માટે હળવદ અને ધ્રાંગધ્રાને પસંદ કરવામાં આવ્યું હતું. એ વખતે વિનોદ ખન્નાએ જબ્બાર સિંઘની ભૂમિકા ભજવી હતી. આ ફિલ્મમાં જબ્બાર સિંઘ તરીકે વિનોદ ખન્નાએ નેગેટિવ ભૂમિકા ભજવી હતી. એ વખતે હળવદ અને ધ્રાંગધ્રાના મહેલોમાં અને રણ વિસ્તારમાં સમગ્ર ફિલ્મનું શૂટિંગ થયું હતું.
શોલેના વીરુની પસંદગીનો પાયો ગુજરાતના ધ્રાંગ્રધ્રામાં નંખાયો હતો
મહિનાઓ સુધી આ ફિલ્મનું શૂટિંગ ચાલ્યું હતું. શરુઆતમાં 50 અઠવાડિયા અને ત્યારબાદ અનેક થિએટરોમાં 100 અઠવાડિયા સુધી ચાલનારી આ ફિલ્મે સૌરાષ્ટ્રમાં ધૂમ મચાવી હતી. ઘોડા અને બુલેટ સાથે નવ યુવાનો ધર્મેન્દ્રના વ્હેમમાં ફરતાં થઈ ગયા હતા.
જાણકારોના મતે ધર્મેન્દ્રને શોલેના વીરુનું પાત્ર મળવાનું મુખ્ય કારણ ગુજરાતમાં બનેલી રેકોર્ડ બ્રેકિંગ ફિલ્મ ‘મેરા ગાંવ મેરા દેશ’ હતી. 1971ની સાલમાં ધર્મેન્દ્ર અહીં અનેક દિવસો રહ્યા હતા અને તેમણે ગુજરાતી સંસ્કૃતિને પૂર્ણ રીતે માણી હતી. એ ફિલ્મમાં ધર્મેન્દ્રએ જબ્બાર સિંઘની નકારાત્મક ભૂમિકા ભજવતાં વિનોદ ખન્નાને એક ફાઈટિંગ સિનમાં મારે છે. એ વખતના અખબારો અને સ્થાનિક લોકોમાં એવી વાયકા પ્રસિદ્ધ થઈ હતી કે ‘અમારા ધ્રાંગધ્રા-હળવદમાં ધર્મેન્દ્રએ જબ્બાર સિંઘને માર્યો હતો’.
ફિલ્મની સફળતા બાદ પણ લોકો ધ્રાંગધ્રા અને હળવદના લોકેશનોમાં જઈને એ સ્થળોને માણતા હતા. આજે ધરમ પાજી નથી રહ્યા ત્યારે એ વિસ્તારના વૃદ્ધો આજે પણ આ ઘટનાને યાદ કરીને પોતાનું દુઃખ વ્યક્ત કરી રહ્યા છે. એ વખતે ધર્મેન્દ્રએ સૌરાષ્ટ્ર અને કચ્છની ભાતીગળ સંસ્કૃતિને માણી હતી. એ સમયના રાજવી પરિવારોમાં તેમણે મહેમાનગતિ કરીને ગુજરાતની યાદો સાથે એક અનોખું જોડાણ બનાવ્યું હતું.
શોલે ફિલ્મ બનવાની હતી એ પહેલાં પણ શોલેને અનુરુપ લોકેશન માટે ગુજરાતમાં રેઈકી કરવામાં આવી હતી. પરંતુ બેંગલુરુ પાસે આવેલા રામનગરમની મુંબઈ સાથેની કનેક્ટિવિટીની અનુકૂળતાને કારણે ગુજરાતના પહાડી ક્ષેત્રોની અનુકૂળતા સર્જાઈ ન હતી.
ધર્મેન્દ્રએ બન્ને પુત્રો સાથે સપ્તાહ સુધી રાજકોટમાં શૂટિંગ કર્યું હતું
પોતાની આગવા અભિનયથી કરોડો દિલો ઉપર રાજ કરનાર ,પંજાબમાં જાટ શિખ કુટુંબમાં 1935માં જન્મેલા પ્રસિઘ્ધ અભિનેતા ધર્મેન્દ્રનું 89 વર્ષની વયે અવસાનથી રાજકોટવાસીઓના 18 વર્ષ પહેલાના આ મહાન અભિનેતાના સંભારણા તાજા થયા છે. 65 વર્ષની કારકીર્દિમાં 300થી વઘુ ફિલ્મોમાં અભિનય આપનાર ધર્મેન્દ્રએ સૌ પ્રથમવાર તેમના બન્ને પુત્રો સાથે ઈ.2007માં રીલીઝ થયેલી ફિલ્મ અપને કરી હતી જે ફિલ્મના મહત્ત્વના ફાઈટ સીનનું શૂટીંગ રાજકોટના રેસકોર્સમાં આવેલા મહાપાલિકાના ઈન્ડોર સ્ટેડિયમ ખાતે કરવામાં આવ્યું હતું.
આ વખતે ધર્મેન્દ્રની સાથે તેમના બન્ને પુત્રો સન્ની દેઓલ અને બોબી દેઓલ ઉપરાંત શિલ્પા શેટ્ટી, કૈટરીના કૈફ, કિરણ ખેર, જાવેદ શેખ વગેરે કલાકારો અને ડાયરેક્ટર અનિલ શર્મા રાજકોટમાં એક સપ્તાહ રહ્યા હતા. ઈન્ડોર સ્ટેડિયમમાં બોબી અને આર્યન વચ્ચે બોક્સીંગ જેમાં ધર્મેન્દ્ર પુત્રને પાનો ચડાવી રહ્યા છે તે દ્રશ્ય વખતે સ્ટેડિયમમાં ચાહકોને બેસાડવામાં આવતા હતા અને ચાહકોનો ધસારો એટલો રહેતો કે બે-ત્રણ કલાકે દર્શકો બદલાવવામાં આવતા હતા.
ફિલ્મમાં ધર્મેન્દ્ર ભૂતપૂર્વ બલદેવ ચૌધરીના રોલમાં હતા જે બોક્સીંગ ક્ષેત્રે પોતાના પુત્રો મારફત સપના સાકાર કરવા ઈચ્છે છે. રાજકોટમાં મોટા બેનરની ફિલ્મનું આ શૂટીંગ પ્રથમવાર હતું જે શૂટીંગ અને ધર્મેન્દ્રને નજીકથી જોવાનો અનુભવ આજે પણ લોકો વિસરી શક્યા નથી.
