સુરત નેચર પાર્કમાં એર કુલર, ફુવારા, પાણીના હોજ અને ઈલેક્ટ્રોલ પાઉડરથી પ્રાણી-પક્ષીઓને ગરમીથી બચાવવાના ઉપાયો

Surat Nature Park : સુરત સહિત ગુજરાતના અનેક શહેરોમાં ગરમીનો કહેર દિવસેને દિવસે વધી રહ્યો છે. હવામાન વિભાગ દ્વારા હીટ એલર્ટ જાહેર કરવામાં આવ્યું છે અને તાપમાન સતત ઊંચે જતા લોકોની હાલત કફોડી બની રહી છે. બપોરના સમયે રસ્તાઓ સુમસામ જોવા મળી રહ્યા છે અને સુરતીઓ ગરમીથી બચવા જરૂરી હોય ત્યારે જ ઘર બહાર નીકળવાનું પસંદ કરી રહ્યા છે. આવી સ્થિતિ વચ્ચે સુરત મહાનગરપાલિકા સંચાલિત સરથાણા નેચર પાર્કમાં પ્રાણી-પક્ષીઓને ગરમીથી બચાવવા માટે વિશેષ આયોજન હાથ ધરવામાં આવ્યું છે. જેમાં એર કુલર, પાણીના હોજ, ઠંડા પાણીના ફુવારા સાથે ઈલેક્ટ્રોલ પાઉડર પણ આપવામાં આવી રહ્યું છે.

સુરત સહિત સમગ્ર ગુજરાતમાં આકરી ગરમી પડી રહી છે અને આગામી દિવસોમાં તાપમાનનો પારો વધુ ચઢે તેવી શક્યતા વ્યક્ત કરવામાં આવી રહી છે. આવી પરિસ્થિતિમાં નેચર પાર્કમાં રહેલા પ્રાણીઓની તબિયત બગડે નહીં, ડિહાઈડ્રેશન ન થાય અને ગરમીનો ત્રાસ ઓછો થાય તે માટે સ્ટાફ સતત કામગીરીમાં લાગી ગયો છે.

નેચર પાર્કમાં રહેલા વાઘ, સિંહ અને અન્ય હિંસક પ્રાણીઓના પાંજરા બહાર એર કુલર ગોઠવવામાં આવ્યા છે જેથી અંદરનું વાતાવરણ ઠંડુ રહી શકે. સાથે સાથે સ્ટાફ દ્વારા ઠંડા પાણીના ફુવારા અને છંટકાવ કરવામાં આવી રહ્યો છે, જેના કારણે પ્રાણીઓને ગરમીમાંથી રાહત મળી રહી છે.

માત્ર બહારથી ઠંડક પૂરતી નથી રહેતી તેથી પ્રાણીઓના આરોગ્યનું પણ ખાસ ધ્યાન રાખવામાં આવી રહ્યું છે. શરીરમાં પાણીની ઉણપ ન સર્જાય અને ક્ષારનું સંતુલન જળવાઈ રહે તે માટે પ્રાણીઓને ઈલેક્ટ્રોલ પાઉડર આપવામાં આવી રહ્યું છે. તેમાં રહેલા સોડિયમ અને પોટેશિયમ જેવા તત્વો ગરમી સામે પ્રાણીઓને રાહત આપવા ઉપયોગી સાબિત થઈ રહ્યા છે.

આ સાથે માંસાહારી તથા મોટા પ્રાણીઓ માટે પાણીના હોજ તૈયાર કરવામાં આવ્યા છે. તેમાં સતત પાણી ભરવામાં આવી રહ્યું છે જેથી પ્રાણીઓ પાણીમાં બેસી શરીરનું તાપમાન ઘટાડે શકે. સિંહ, વાઘ, રીંછ જેવા પ્રાણીઓ માટે આ વ્યવસ્થા લાભદાયક બની રહી છે.

પ્રાણીઓ ઉપરાંત પક્ષીઓ માટે પણ ખાસ કાળજી લેવામાં આવી રહી છે. પીંજરા નજીક પાણીનો છંટકાવ, વધારાનું પીવાનું પાણી અને ઠંડક માટેની વ્યવસ્થા ગોઠવવામાં આવી છે. નાના પક્ષીઓ પર ગરમીની અસર ઝડપથી થતી હોવાથી સ્ટાફ સતત નજર રાખી રહ્યો છે.