પરણીતાએ કહ્યું હું વડોદરા નહી છોડુ.. પતિ અને સાસુએ ટેમ્પોમાં સામાન મોકલી દીધો

વડોદરા, તા. 05

શહેરના છાણી જકાતનાકા વિસ્તારમાં વડોદરા છોડી રાજસ્થાન સ્થાયી થવા માગતા પરિવાર સાથે જવા તૈયાર નહીં થનાર પરિણીતાનો સામાન જબરજસ્તી ટેમ્પોમાં રવાના કરી દેવાતા તેણે પોલીસની મદદ લીધી છે.

છાણી જગાતનાકા વિસ્તાર રહેતી પરિણીતાએ પોલીસને કહ્યું છે કે, મારા પતિ વિજય રાઠોડને બીપી અને ડાયાબિટીસની બીમારી હોવાથી હાલમાં તે કોઈ કામ ધંધો કરતા નથી. જ્યારે હું સિલાઈ કામ કરીને ઘરનું ગુજરાન ચલાવું છું. મારી સાથે મારા સાસુ મેનાબેન પણ રહે છે.

છેલ્લા કેટલાક સમયથી મારા પતિ વડોદરા છોડી તેમની માતા સાથે રાજસ્થાન જોવા માટે આગ્રહ કરી રહ્યા છે. પરંતુ અહીં મારે રોજી મળી રહેતી હોવાથી મેં ઇનકાર કર્યો હતો.

પરિણીતાએ કહ્યું છે કે, ગઈકાલે બપોરે હું સિલાઈના કામે ગઈ હતી તે દરમિયાન પતિનો ફોન આવ્યો હતો અને તાત્કાલિક ઘેર બોલાવી હતી. હું જ્યારે ઘેર પહોંચી ત્યારે ટેમ્પામાં સામાન ભરેલો હતો. મેં ટેમ્પો રોકવા જતાં પતિએ તારો સામાન નહીં ઉતરે તેમ કરી માર માર્યો હતો. સાસુ એ પણ મને ગાળો ભાંડી હતી અને બંને જણાએ મારો હાથ પકડીને ખેંચી લઇને ટેમ્પો રવાના કરી દીધો હતો.

આ બનાવ બાદ ફતેગંજ પોલીસને જાણ કરતા પોલીસે પતિ અને સાસુ સામે ગુનો નોંધી ફરિયાદ નોંધી કાર્યવાહી કરી છે.