વડોદરા,મતદારો સુધી સરકારી તંત્ર વોટર સ્લિપ પહોંચાડવામાં નિષ્ફળ નિવડયુ હતું. જેના પગલે ભાજપ અને કોંગ્રેસ પક્ષ દ્વારા આપવામાં આવેલી સ્લિપ લઇને જ મતદારો મતદાન મથક પર પહોંચી ગયા હતા.
નવી મતદાર યાદી પ્રસિદ્ધ થયા પછીના પહેલા મતદાનમાં કેટલાક મતદારોના વોર્ડ અને મતદાન મથકો બદલાઇ ગયા હતા. જેના કારણે મતદારોને મતદાન મથક સુધી પહોંચવામાં તકલીફ થઇ રહી હતી. તદુપરાંત સરકારી તંત્ર પણ વોટર સ્લિપ કે જેમાં મતદાન મથકના એડ્રેસ, મતદાર ક્રમાંક સહિતની વિગતો દર્શાવવામાં આવતી હોય છે, તેવી વોટર સ્લિપ મતદારો સુધી પહોંચાડવામાં નિષ્ફળ રહ્યું હતું. જ્યારે ભાજપ કોંગ્રેસના ઉમેદવારોએ પોતાના ફોટા અને ક્રમાંક સહિત પોતાને મત આપવાનું જણાવતી સ્લિપો મતદારોના ઘરે પહોંચાડી હતી. કેટલાક મતદાન મથકો પર મતદારો ઉમેદવારોના ફોટા વાળી સ્લિપ લઇને જ મતદાન મથક સુધી પહોંચી ગયા હતા. સ્ટાફે પણ આવી સ્લિપોના આધારે જ તેઓનો ક્રમાંક શોધવામાં સરળતા રહી હતી. આચાર સંહિતાના ભંગ અંગે તંત્ર દ્વારા પણ મૌન સેવવામાં આવ્યું હતું.
