ચાઈનીઝ દોરીના 672 ફિરકા સાથે શખ્સ ઝડપાયો, 2 લાખની મત્તા જપ્ત

- સામરખા એક્સપ્રેસ હાઈવે નજીકથી 

- અમદાવાદના સાણંદ નજીકથી ઝડપાયેલા શખ્સે કબૂલાત કરતા પોલીસે દરોડો પાડયો 

આણંદ : આણંદ ગ્રામ્ય પોલીસે સામરખા એક્સપ્રેસ હાઈવે નજીક આવેલા ગરનાળા પાસે જુના ફ્રિજ વેચતા ગોડાઉનમાં છાપો મારીને પ્રતિબંધિત ચાઈનીઝ દોરીના ૬૭૨ નંગ ફિરકા સાથે એક શખ્સને ઝડપી પાડયો હતો. પોલીસે રૂપિયા બે લાખથી વધુનો મુદ્દામાલ કબજે લઈ ઝડપાયેલ શખ્સ વિરુદ્ધ ગુનો નોંધી કાર્યવાહી હાથ ધરી હતી.

અમદાવાદ ગ્રામ્ય એસઓજી પોલીસની ટીમે સાણંદ પોલીસ મથકની હદમાંથી એક શખ્સને પ્રતિબંધિત ચાઈનીઝ દોરીના જથ્થા સાથે ઝડપી પાડયો હતો. પોલીસે તેની પૂછપરછ કરતા આ ચાઈનીઝ દોરીનો જથ્થો તે સામરખા એક્સપ્રેસ હાઈવે ઉપર આવેલા ગરનાળા નજીકના સોમનાથ ઓલ્ડ સ્ટોરેજની પાછળ આવેલા જુના ફ્રીજ રાખતા ગોડાઉનમાંથી ભુરીયા નામના વ્યક્તિ પાસેથી લાવ્યો હોવાની કબુલાત કરી હતી. જેથી એસઓજી પોલીસે આ અંગે આણંદ ગ્રામ્ય પોલીસને જાણ કરતાં પોલીસની ટીમ રવિવારની રાત્રિના મહિતી મળેલા સ્થળે ત્રાટકી હતી. જ્યાં ગોડાઉન ખાતેથી એક શખ્સ મળી આવતા પોલીસે તેનું નામઠામ પૂછતા તેણે રસીદશા ઉર્ફે ભુરીયો મેહબૂબશા દીવાન (રહે. વ્હોરા સોસાયટી, આણંદ) હોવાની ઓખળ આપી હતી. પોલીસે ગોડાઉનમાં તપાસ કરતા જુના ફ્રિજના ભંગારની આડમાં છુપાવી રાખેલા પ્રતિબંધિત ચાઈનીઝ દોરીના ૧૪ કાર્ટુન મળી આવ્યા હતા. જેમાંથી પોલીસે ૬૭૨ નંગ ફીરકા કબજે લીધા હતા. પોલીસે જાહેરનામા ભંગનો ગુનો નોંધી વધુ કાર્યવાહી હાથ ધરી હતી.