અમદાવાદ: વિદ્યાર્થી પર જીવલેણ હુમલો કરનારો મુખ્ય આરોપી ઝડપાયો, પોલીસે વરઘોડો કાઢ્યો

Ahmedabad News: અમદાવાદના ગુજરાત યુનિવર્સિટી વિસ્તારમાં આવેલી GLS કોલેજ નજીક વિદ્યાર્થી પર હુમલો કરનારા મુખ્ય આરોપી આદિત્યસિંહ દિલીપસિંહ રાઠોડની ધરપકડ કરવામાં આવી છે. નવરંગપુરા પોલીસે ગંભીર ગુનાના સ્થળે આરોપીનું રિકન્સ્ટ્રક્શન પંચનામું કરી કાયદેસરની કાર્યવાહી હાથ ધરી હતી. નોંધનીય છે કે, આદિત્યસિંહ કુખ્યાત બુટલેગર કિશોર લંગડાનો પૌત્ર છે.  

શું હતી સમગ્ર ઘટના?

મળતી માહિતી અનુસાર, ગત નવમી ફેબ્રુઆરીના રોજ બપોરના સમયે આ બનાવ બન્યો હતો. પીડિત વિદ્યાર્થી પોતાની કારમાં બેઠો હતો ત્યારે 19 વર્ષીય આદિત્યસિંહ રાઠોડ અને તેના બે મિત્રોએ કાર અને મોપેડ પર આવી અચાનક હુમલો કર્યો હતો. આરોપીઓએ હથિયાર વડે કારના કાચ તોડી નાખ્યા હતા અને પીડિતના ગળાના ભાગે ચાકુથી મારવાનો પ્રયાસ કર્યો હતો. સદનસીબે મોટી જાનહાનિ ટળી હતી. પોલીસની પ્રાથમિક તપાસ મુજબ, કોઈ સામાન્ય બોલાચાલી બાદ ઉશ્કેરાઈને આ હુમલો કરવામાં આવ્યો હતો. જો કે, આ હુમલાનું કારણ હજુ સ્પષ્ટ થયું નથી. 

આ પણ વાંચો: અમદાવાદમાં વસતી ગણતરી: આ રીતે ઘરે બેઠા કરી શકાશે ‘સેલ્ફ સેન્સસ’, જાણો સ્ટેપ બાય સ્ટેપ પ્રોસેસ

પોલીસે આ રીતે ઝડપ્યો આરોપી

આ ઘટના બાદ આરોપી છેલ્લા બે મહિનાથી નાસતો ફરતો હતો. ઝોન-1 LCBની ટીમને બાતમી મળી હતી કે આરોપી ગાંધીનગરના PDPU કેમ્પસ નજીક નાસ્તો કરવા આવે છે. આ બાતમીના આધારે પોલીસે ઓપરેશન પાર પાડીને મુખ્ય આરોપી આદિત્ય સિંહ રાઠોડને ઝડપી પાડ્યો હતો.

ઈન્ચાર્જ PI જે. પી. ચૌધરીએ જણાવ્યું કે, 'ઘટનાની ગંભીરતાને જોતા હત્યાના પ્રયાસનો ગુનો નોંધવામાં આવ્યો છે. આરોપી પોતે વેપારી વર્ગ સાથે સંકળાયેલો છે. હાલ મુખ્ય આરોપી પોલીસ સકંજામાં છે અને તેનું રિકન્સ્ટ્રક્શન પંચનામું કરવાની પ્રક્રિયા ચાલુ છે. આ કેસમાં સંડોવાયેલા અન્ય બે ફરાર આરોપીને પકડવા માટે પણ ચક્રો ગતિમાન કર્યા છે.'