VIDEO: અમરેલીના ખાંભામાં યુવાન પર સિંહનો હુમલો, ધારીના બોરડી ગામે દીપડાના આંટાફેરાથી સ્થાનિકોમાં ભય

Amreli News : અમરેલી, ગીર સહિતના પંથકમાં ગામડાંઓમાં સિંહના આંટાફેરાના વીડિયો સામે આવતા હોય છે. તેવામાં અમરેલીના ખાંભામાં એક યુવાન પર સિંહે હુમલો કર્યો હોવાની ઘટના સામે આવી છે. સિંહના હુમલાથી યુવાન ઈજાગ્રસ્ત થતાં સારવાર માટે હોસ્પિટલ ખસેડવામાં આવ્યા હતો. બીજી તરફ, ધારીના બોરડી ગામે દીપડો જોવા મળતાં સ્થાનિકોમાં ફફડાટ છવાયો છે. ગામમાં દીપડાના આંટાફેરાના દ્રશ્યો સીસીટીવીમાં કેદ થયા છે, ત્યારે વીડિયો સોશિયલ મીડિયામાં વાઈરલ થઈ રહ્યો છે.

અમરેલીના ખાંભામાં યુવાન પર સિંહનો હુમલો

અમરેલીના ખાંભાના ગીદરડી ગામના યુવાન પર સિંહે હુમલો કર્યો હતો. મુકેશ લખુભાઈ સોંલકી (ઉં.વ. 38) નામના યુવક ખેતરમાં પાણી વાળવાનું કામ કરી રહ્યા હતા. આ દરમિયાન અચાનક ત્યાં સિંહ આવી પહોંચે છે અને મુકેશ પર હુમલો કરી બેસે છે. જેમાં યુવકને જમણાં પડખાના ભાગે સિંહે નહોર માર્યા હતા. 

આ પણ વાંચો: ગીર ગઢડામાં માતાની નજરો સામે સિંહણ બે વર્ષની બાળકીને ઉઠાવી ગઇ, 1 કિ.મી. દૂર લાશ મળી

સમગ્ર ઘટનામાં ઈજાગ્રસ્ત થયેલા યુવકને સારવાર માટે 108 મારફતે પ્રથમ ખાંભા બાદ અને પછી વધુ સારવાર માટે અમરેલી ખસેડવામાં આવ્યો હતો. વનવિભાગના સૂત્રોએ જણાવ્યું હતું કે, સિંહના હુમલાના સ્થળે દીપડાના પણ પગના નીશાન જોવા મળ્યા હતા. 

ધારીના બોરડી ગામે દીપડાના આંટાફેરા

બીજી તરફ, ધારીના બોરડી ગામે દીપડાના આંટાફેરાના દ્રશ્યો સીસીટીવીમાં કેદ થયા છે. વીડિયોમાં દીપડો બોરડી ગામની શેરીઓ અને મકાન પર લટાર મારતો જોવા મળે છે. શિકારની શોધમાં ગામમાં ઘૂસેલા દીપડાનો વીડિયો સોશિયલ મીડિયામાં વાઈરલ રહ્યો છે.