જીકાસ શરુ નહીં થતા યુનિ.ની પ્રવેશ પરીક્ષાઓ આપનારાની સંખ્યા ઘટે તેવી શક્યતા

વડોદરાઃ એમ.એસ.યુનિવર્સિટી સત્તાધીશોએ વિવિધ ફેકલ્ટીના ડિગ્રી અભ્યાસક્રમોમાં પ્રવેશ માટેના એન્ટ્રન્સ ટેસ્ટ તા.૧૬ થી ૧૮ મે દરમિયાન લેવાની જાહેરાત તો કરી દીધી છે પણ જીકાસ પોર્ટલ પર રજિસ્ટ્રેશન શરુ નહીં થયું હોવાથી સત્તાધીશો મૂંઝવણમાં મૂકાયા છે.

કોમર્સ ફેકલ્ટીમાં એફવાયબીકોમ સહિત અન્ય તમામ પ્રવેશ પરીક્ષાઓ આપવા માગતા વિદ્યાર્થીઓ માટે એમ.એસ.યુનિવર્સિટીની સાથે સાથે જીકાસ પોર્ટલ પર રજિસ્ટ્રેશન ફરજિયાત છે.પ્રવેશ પરીક્ષાઓના આડે હવે પંદર દિવસ જ રહ્યા છે ત્યારે  યુનિવર્સિટીની વિવિધ ફેકલ્ટીઓએ તો વેબસાઈટ પર ઓનલાઈન રજિસ્ટ્રેશન શરુ કરી દીધું છે પણ જીકાસ પોર્ટલ પર તો હજી રજિસ્ટ્રેશન શરુ થયું નથી.ઉપરાંત બેઠક નંબરો જાહેર કરવા માટે તથા બીજી વ્યવસ્થા કરવા માટે પરીક્ષાના ત્રણ ચાર દિવસ અગાઉથી વિદ્યાર્થીઓનું રજિસ્ટ્રેશન પણ બંધ કરવું પડશે.

આ સંજોગોમાં સત્તાધીશોને ચિંતા છે કે,  પ્રવેશ પરીક્ષા આપનારા વિદ્યાર્થીઓની સંખ્યામાં ઘટાડો થશે.ઉપરાંત ધો.૧૨ની પરીક્ષા પૂરી થયા બાદ ઘણા વિદ્યાર્થીઓ બહારગામ જતા રહ્યા છે.જેમને હજી સુધી પ્રવેશ પરીક્ષાઓ અંગે પૂરતી જાણકારી પણ નથી.આમ યુનિવર્સિટી માટે જીકાસ પોર્ટલ એડમિશન શરુ થતા પહેલા જ માથાનો દુખાવો બન્યું છે.

કાયમી અધ્યાપકોની ભરતી માટે ઓનલાઈન અરજી કરવામાં અડચણ

એમ.એસ.યુનિવર્સિટીમાં કાયમી અધ્યાપકોની ૭૯૪ જેટલી જગ્યાઓ પર ભરતી માટેની પ્રક્રિયા શરુ કરાઈ છે પણ તેમાં ઓનલાઈન એપ્લિકેશન કરવામાં ઉમેદવારોને મુશ્કેલી પડી રહી હોવાની ફરિયાદો ઉઠી છે.

ઉમેદવારોનું કહેવું છે કે, છેલ્લા પાંચ દિવસથી યુનિવર્સિટીના પોર્ટલ પર એપ્લિકેશન થઈ રહી નથી. ઉમેદવારો પોર્ટલ પર લોગ ઈન જ થઈ નથી શકતા.સત્તાધીશોએ ભરતી માટે જાહેર કરેલા નોટિફિકેશનમાં ઈ-મેઈલ એડ્રેસ આપીને કહ્યું છે કે, જો એપ્લિકેશન કરવામાં કોઈ મુશ્કેલી આવે તો ઉમેદવારો ઈ મેઈલ પર જાણકારી આપી શકે છે.

એક ઉમેદવારે તો છેલ્લા પાંચ દિવસમાં સંખ્યાબંધ વખત યુનિવર્સિટીને ઈ-મેઈલ કર્યા હોવા છતા યુનિવર્સિટી દ્વારા તેનો જવાબ પણ આપવામાં આવ્યો નથી.ઉલ્લેખનીય છે કે, યુનિવર્સિટીમાં કાયમી ભરતી માટે ઓનલાઈન અરજી કરવાની છેલ્લી તારીખ ૧૭ એપ્રિલ છે.બીજી તરફ હંગામી અધ્યાપકોની ભરતી માટે ઓનલાઈન અરજી કરવાની સમય મર્યાદા આજે પૂરી થઈ છે.