વડોદરામાં દસ દિવસમાં ચોમાસાની દસ્તકઃ પહેલીવાર તમામ સુરક્ષા તળોની સંયુક્ત ડિઝાસ્ટર વર્કશોપ

વડોદરાઃ વડોદરામાં આગામી દસ દિવસ દરમિયાન ચોમાસું દસ્તક દે તેવી શક્યતા હોવાથી પૂર કે વાવાઝોડાની પરિસ્થિતિને પહોંચી વળવા માટે પહેલીવાર તમામ સુરક્ષા દળોની સંયુક્ત ડિઝાસ્ટર મેનેજમેન્ટ વર્કશોપ યોજાઇ હતી.

વડોદરામાં અતિવૃષ્ટિ અને વાવાઝોડાને કારણે મકાનો પડવાના,ઘરોમાં પાણી ભરાઇ જવાના,વૃક્ષો,હોર્ડિંગ્સ,પતરાં અને સોલર પેનલ પડવા જેવા બનાવો બનતા હોય છે.જે દરમિયાન સમયસર મદદ મળતી નહિ હોવાના પણ કિસ્સાઓ બનતા હોય છે.

આગામી દસ દિવસમાં ચોમાસાનું આગમન થવાની શક્યતા હોવાથી આજે પહેલીવાર પોલીસ કમિશનર સહિતના વિવિધ વિભાગોના અધિકારીઓએ પ્રતાપનગર પોલીસ હેડક્વાર્ટર ખાતે એક સંયુક્ત વર્કશોપનું આયોજન કર્યું હતું.

વર્કશોપમાં ડિઝાસ્ટર મેનેજમેન્ટના અધિકારીઓ ઉપરાંત પોલીસ,સિવિલ ડિફેન્સ,હોમગાર્ડ,એસડીઆરએફ,ફાયર બ્રિગેડ,ટ્રાફિક બ્રિગેડ સહિતના જવાનોએ ભાગ લીધો હતો.આ દરમિયાન જુદાજુદા સાધનોનું નિદર્શન અને બચાવ કામગીરી માટે સૂચનાઓ આપવામાં આવી હતી.