જસદણમાં હૃદય કંપાવી દે તેવી કરૂણ ઘટના: નિર્દયી માતા-પિતા નવજાત શિશુને કાંટાની વાડમાં જીવતું ફેંકી ગયા

Rajkot Crime News: રાજકોટ જિલ્લાના જસદણમાં આજે માનવતાને શર્મસાર કરતી એક હૃદયદ્રાવક ઘટના સામે આવી છે. અહીં કોઈક નિર્દયી માતા-પિતા તેમના નવજાત શિશુને જન્મ આપ્યા બાદ જીવતું જ કાંટાની વાડમાં ફેંકીને ફરાર થઈ ગયા હતા.

મળતી માહિતી મુજબ જસદણા ગંગા ભુવન વિસ્તારમાં આવેલા પ્રમુખ પાર્ક નજીક એક કાંટાની જાળીમાંથી નવજાત શિશુ મળી આવ્યું હતું. આ માસૂમ બાળક છેલ્લા બે કલાકથી કાંટામાં ફસાયેલું રડી રહ્યું હતું. આસપાસના લોકોને બાળકના રડવાનો અવાજ સતત સંભળાતો હતો, પરંતુ અવાજ ક્યાંથી આવી રહ્યો છે તે શરૂઆતમાં સમજાતું ન હતું.

જ્યારે અવાજ બંધ ન થયો, ત્યારે સ્થાનિક લોકો ભેગા થઈ ગયા હતા અને મદદ માટે દોડી આવ્યા હતા. શોધખોળ દરમિયાન પ્રમુખ પાર્ક નજીકની કાંટાની વાડમાં બાળક ફસાયેલી હાલતમાં મળી આવતા સૌ કોઈ ચોંકી ઉઠ્યા હતા.

જાગૃત નાગરિકોએ તાત્કાલિક આ ઘટનાની જાણ 108 એમ્બ્યુલન્સ સેવા અને જસદણ પોલીસને કરી હતી. 108ની ટીમે તુરંત ઘટનાસ્થળે પહોંચી બાળકને કાંટાની વાડમાંથી સુરક્ષિત બહાર કાઢ્યું હતું અને તેને તાત્કાલિક સારવાર માટે જસદણ સિવિલ હોસ્પિટલ ખાતે ખસેડવામાં આવ્યું હતું.

આ ઘટનાને પગલે સમગ્ર પંથકમાં અરેરાટી વ્યાપી ગઈ છે અને લોકો આવા કઠોર માતા-પિતા પર ફિટકાર વરસાવી રહ્યા છે. જસદણ પોલીસે આ મામલે ગુનો નોંધીને વધુ તપાસ હાથ ધરી છે અને બાળકને ત્યજી દેનાર નિર્દયી માતા-પિતાની શોધખોળ શરૂ કરી છે.