જામનગર નજીક ગમખ્વાર અકસ્માત: ટ્રકની ટક્કરે બાઇકસવાર બે યુવકોના ઘટનાસ્થળે જ મોત

Jamnagar News: જામનગર શહેર અને આસપાસના વિસ્તારમાં છેલ્લા કેટલાક સમયથી અકસ્માતોની હારમાળા જોવા મળી રહી છે, ત્યારે આજે વધુ એક ગમખ્વાર અકસ્માતનો બનાવ સામે આવ્યો છે. જામનગર નજીક ચેલા ગામ પાસે એક ટ્રક અને બાઇક વચ્ચે સર્જાયેલા ભયંકર અકસ્માતમાં બે યુવકોના ઘટનાસ્થળે જ કરૂણ મોત નિપજ્યા છે, જ્યારે અન્ય બે વ્યક્તિઓ ઘાયલ થતાં તેમને હોસ્પિટલે ખસેડવામાં આવ્યા છે.

પ્રાપ્ત વિગતો અનુસાર ટ્રક ચાલકે પોતાના વાહનને બેફામ ગતિએ હંકારીને બાઇકને જોરદાર ટક્કર મારી હતી. એવું માનવામાં આવી રહ્યું છે કે ટ્રક ચાલકે સ્ટિયરિંગ પરથી કાબૂ ગુમાવતા આ અકસ્માત સર્જાયો હતો. આ ગંભીર ટક્કરના કારણે બાઇક પર સવાર બે યુવાનોને માથાના ભાગે ગંભીર ઈજાઓ થતાં તેમનું ઘટનાસ્થળે જ મૃત્યુ નીપજ્યું હતું. 

આ અકસ્માતની જાણ થતાં જ પોલીસની ટીમ તાત્કાલિક ઘટનાસ્થળે દોડી ગઈ હતી. પોલીસે બંને મૃતદેહોનો કબજો મેળવીને પોસ્ટમોર્ટમ માટે મોકલી આપ્યા હતા અને ટ્રક ચાલક વિરુદ્ધ અકસ્માતે ગુનો નોંધીને વધુ કાયદેસરની કાર્યવાહી હાથ ધરી છે. પોલીસે આ અકસ્માત કયા સંજોગોમાં સર્જાયો તે અંગે તપાસ શરૂ કરી છે.