ચૂંટણી પૂર્ણ થતાં જ જામનગરમાં 'બુલડોઝર' એક્શન, હાપામાં 1.20 લાખ ચો.ફૂટ જમીન પરથી દબાણો દૂર

Jamnagar Demolition News : સ્થાનિક સ્વરાજની ચૂંટણી પ્રક્રિયા પૂર્ણ થતાં જ જામનગર મહાનગરપાલિકાએ ગેરકાયદેસર દબાણો સામે કડક વલણ અપનાવ્યું છે. રવિવારે સવારથી જ હાપા વિસ્તારમાં ઇસ્કોન મંદિરની બાજુમાં આવેલી અંદાજે 1,20,000 ચોરસ ફૂટ સરકારી જમીન પર તંત્રએ મેગા ડિમોલેશન હાથ ધરી તેને દબાણમુક્ત કરાવી હતી.

16 આસામીઓના વ્યાવસાયિક દબાણો જમીનદોસ્ત

હાપા વિસ્તારમાં શહેરી ગરીબોના આવાસ માટે ફાળવવામાં આવેલી આ કિંમતી જમીન પર લાંબા સમયથી 16 જેટલા આસામીઓએ ગેરકાયદેસર કબજો જમાવ્યો હતો. તંત્ર દ્વારા અહીં ખડકાયેલા ગેરેજ, વર્કશોપ, ભંગારના વાડા અને ટાઇલ્સ રાખવાના મોટા પ્લોટ સહિતના કોમર્શિયલ બાંધકામો તોડી પાડવામાં આવ્યા હતા. આ જમીનની બજાર કિંમત અંદાજે 45 કરોડ રૂપિયાથી વધુ હોવાનું આંકવામાં આવ્યું છે.

100 કર્મચારીઓ અને 6 જેસીબીની ફોજ ઉતારાઈ

આજની કામગીરી એટલી વિશાળ હતી કે તંત્રએ કોઈ પણ વિરોધને પહોંચી વળવા માટે મોટી તૈયારી કરી હતી. મનપાના આસિસ્ટન્ટ કમિશનર અને સિક્યુરિટી અધિકારીની દેખરેખ હેઠળ એસ્ટેટ, ફાયર બ્રિગેડ, સ્લમ વિભાગ અને સોલિડ વેસ્ટ શાખાના અંદાજે 100 જેટલા કર્મચારીઓ જોડાયા હતા. ડિમોલેશન માટે 6 જેસીબી, હિટાચી મશીન અને 6 ટ્રેક્ટરોનો ઉપયોગ કરીને સવારના 08:00 વાગ્યાથી ઓપરેશન શરૂ કરવામાં આવ્યું હતું.

ચૂંટણી બાદ તંત્રની કડક કાર્યવાહી

મહાનગરપાલિકાએ અગાઉ આ તમામ આસામીઓને નોટિસ પાઠવી હતી, પરંતુ ચૂંટણીના માહોલ વચ્ચે કાર્યવાહી અટકેલી હતી. જેવી ચૂંટણી પ્રક્રિયા સંપન્ન થઈ કે તરત જ તંત્રએ આ આક્રમક અભિગમ અપનાવ્યો છે, જેનાથી દબાણકર્તાઓમાં ફફડાટ વ્યાપી ગયો છે. અધિકારીઓના જણાવ્યા મુજબ, આગામી દિવસોમાં શહેરના અન્ય વિસ્તારોમાં પણ આવા ગેરકાયદેસર દબાણો સામે ઝુંબેશ ચાલુ રહેશે.