નવી સ્ટ્રોમ વોટર લાઈન નાંખવાના કામમા ગેરરીતી, એડીશનલ સીટી ઈજનેર સહિત મ્યુનિ.ના ચાર ઈજનેર સસ્પેન્ડ

અમદાવાદ,સોમવાર,18 મે,2026

અમદાવાદ પૂર્વમાં નવી સ્ટ્રોમ વોટર લાઈન અને ડ્રેનેજ લાઈન નાંખવાના કામમા ગંભીર ગેરરીતી બહાર આવતા મ્યુનિસિપલ કમિશનર બંછાનિધિ પાનીએ પૂર્વ ઝોનના એડીશનલ સીટી ઈજનેર રાજેશ રાઠવા સહિત કોર્પોરેશનના ચાર ઈજનેરોને સસ્પેન્ડ કર્યા છે.કામગીરી કર્યા વગર પેકેજ-૧ના કોન્ટ્રાકટર કેવડીયા ઈન્ફ્રાસ્ટ્રકચરની મેજરમેન્ટ બુકમાંથી કોપી પેસ્ટ કરી કોન્ટ્રાકટર ધુ્વી બિલ્ડકોનને રુપિયા ૭૬ લાખથી વધુની રકમ ચૂકવી દેવાતા આ રકમ રીકવર કરી જવાબદારો સામે પોલીસ ફરિયાદ કરવામા આવશે. કોન્ટ્રાકટરને બ્લેકલિસ્ટ કરવામા આવશે.

પ્રાથમિક તપાસમાં બહાર આવેલી વિગત મુજબ, પૂર્વ ઝોનમાં પ્રોજેકટ ઈમ્પલીમેન્ટ યુનિટ અંતર્ગત નવી સ્ટ્રોમ વોટર લાઈન નાંખવા ધુ્વી બિલ્ડકોન પ્રા.લી.ને રુપિયા ૨.૯૨ કરોડનુ ટેન્ડર આપવામા આવ્યુ હતુ.જે પૈકી રુપિયા ૨.૫૮ કરોડના ટેન્ડરને સ્ટેન્ડિંગ કમિટીએ પાંચ જુન-૨૫ના રોજ મંજૂરી આપી હતી.કોન્ટ્રાકટરને કુલ રુપિયા ૨.૪૦ કરોડની ચૂકવણી કરવામા આવી હતી.પૂર્વઝોનની મેઝરમેન્ટ બુકમા નોંધાયેલા કામ અને વાસ્તવિક સાઈટ ઉપર થયેલા કામમા તફાવત જોવા મળ્યો હતો.મેઝરમેન્ટ બુકના આર.એ.બીલ-૨માં ૧૬૦૦ એમ.એમ.ડાયા લાઈનના મેઝરમેન્ટ અગાઉ વર્ષ-૨૦૨૪મા વસ્ત્રાલ વોર્ડમાં નવી સ્ટ્રોમ વોટર લાઈન નાંખવાના પેકેજ-૧ના કોન્ટ્રાકટર દ્વારા કરવામા આવેલી કામગીરીનુ કોપી પેસ્ટ કરવામા આવ્યુ હતુ.કોપી પેસ્ટ કરેલા મેઝરમેન્ટ તેમજ બિલ એબસ્ટ્રેકના પાના બદલી ૯૦૦ અને ૧૨૦૦ એમ એમ ડાયા લાઈનના મેઝરમેન્ટ રજૂ કરી મેઝરમેન્ટ બુકમા નોંધવામા આવેલા તફાવત મુજબ ૫.૫૩ લાખ વ્યાજ સહિત રીકવર કરાશે એવો કોર્પોરેશન તંત્રે દાવો કર્યો છે.વિવિધ સ્થળે અલગ અલગ સાઈઝ અને ઉંડાઈના સ્લેબ ટાઈપ મેનહોલ બનાવાયા હોવાના કારણે કોર્પોરેશનને અંદાજે રુપિયા ૨૦.૯૫ લાખનુ નુકસાન થયુ છે.જે સીટી ઈજનેરનો અભિપ્રાય મેળવી રિકવર કરવામા આવશે.

કોની સામે ખાતાકિય તપાસ-સસ્પેન્શન

-રાજેશ રાઠવા-એડીશનલ સીટી ઈજનેર,પૂર્વ ઝોન

-ઉત્કર્ષ ભાભોર-ડેપ્યુટી સીટી ઈજનેર

-રમેશ બારીયા, આસિસ્ટન્ટ સીટી ઈજનેર

-અલ્પેશ મકવાણા-આસિસ્ટન્ટ ઈજનેર