વડોદરા બ્રાઈટ સ્કૂલમાં પંખો પડતા વિદ્યાર્થીને ઇજા ના કિસ્સામાં ગુજરાત માનવ આયોગ એક્સનમાં

વડોદરા

વડોદરા ભાયલી ખાતે ખાનગી શાળામાં કલાસરૂમમાં સીલીંગ પંખો તૂટી પડતાં 10 વર્ષના વિદ્યાર્થીને માથાના ભાગે આઠ ટાંકા આવ્યા હતા. જે અંગે ગુજરાત રાજ્ય માનવ આયોગ એક્શનમાં આવ્યું હતું. અને જવાબદાર સામે પોલીસને કાર્યવાહીની સુચના આપતા તાલુકા પોલીસે વિદ્યાર્થીની સુરક્ષાના મામલે બેદરકારી દાખવનાર શાળાના કર્મચારીઓ સામે કાયદેસરની કાર્યવાહી હાથ ધરી છે.

૧૪મી ફેબ્રુઆરીના રોજ ભાયલી ખાતે આવેલી બ્રાઇટ ડે શાળા માં ચાલુ વર્ગમાં વિદ્યાર્થી તથા શિક્ષક ની ઉપસ્થિતિમાં  ચાલુ ક્લાસરૂમમાં સીલીંગ ફેન તૂટી પડયો હતો . આ ઘટનામાં 10 વર્ષીય વિદ્યાર્થીને ઇજાઓ પહોંચતા ખાનગી હોસ્પિટલમાં ખસેડાતા માથાના ભાગે આઠ ટાંકા આવ્યા હતા . જે અંગે ગુજરાત રાજ્ય માનવ આયોગમાં ફરિયાદ થતા સુઓમોટો હેઠળ માનવ અધિકાર આયોગ તરફથી કેસ દાખલ કરવામાં આવ્યો હતો. વિદ્યાર્થીના વાલીએ ફરિયાદ કરવાનું ટાળતા ચાલુ વર્ષે ૨૩મી જૂનના રોજ તાલુકા પોલીસ મથકે જાણવાજોગ અરજી નોંધી વડોદરા તાલુકા પોલીસ સબ ઇન્સ્પેક્ટર આર.કે રાઠવા ફરિયાદી બન્યા હતા. માનવ અધિકાર આયોગની કચેરીમાંથી પોલીસને જવાબદાર વિરુદ્ધ કાયદેસર કાર્યવાહી કરવા માટે ની સૂચના મળી હતી. પોલીસની તપાસ દરમિયાન શાળાના જવાબદાર કર્મચારી તથા મેન્ટેનન્સનું કામ સંભાળતા સ્ટાફે ફીટીંગ કરેલા સિલિંગ પંખા નું સમયસર મેન્ટેનન્સ તેમજ રીપેરીંગ નહીં કરી નિષ્કાળજી દાખવતાં પંખો ચાલુ ક્લાસે બાળકના માથા ઉપર પડી ઈજા પહોંચી હોવાની વિગતો બહાર આવી હતી.