કાપોદ્રામાં હીરાના ચોરીમાં બેની ધરપકડ: ઉપાડ માટે ના પાડી તો કારખાનામાંથી 1.80 લાખના હીરા ઉપાડી લીધા હતા

- હીરા ચોરી કરનાર રત્નકલાકાર ભુપત વડાલીયા રીઢો ચોરઃ 26 જગ્યાએ ચોરીનો કસબ અજમાવ્યો હતો

સુરત
કાપોદ્રા સ્નેહમુદ્રા સોસાયટીમાં યાના ડાયમંડ નામના કારખાનામાંથી રૂ. 1.80 લાખના 10 હીરા ચોરી કરનાર રત્નકલાકાર અને તેની પાસેથી હીરા ખરીદનાર કારખાનેદાર સહિત બેની ધરપકડ કરી છે. કારખાનાના ભાગીદારે ઉપાડ આપવાની ના પાડતા રીઢા ચોર એવા રત્નકલાકારે ચોરીનો કસબ અજમાવ્યો હતો.
કાપોદ્રાની સ્નેહમુદ્રા સોસાયટી ખાતા નં. 76 ના ગ્રાઉન્ડ ફ્લોર પર યાના ડાયમંડ નામના કારખાનામાંથી પાંચ દિવસ અગાઉ રાત્રે રૂ. 1.80 લાખની મત્તાના હીરાની ચોરી થઇ હતી. કારખાનાના દરવાજા અને ગ્રીલનું તાળું તોડી ઓફિસમાં તોડફોડ કરી ચોરીનો કસબ અજમાવનાર ચોર સીસીટીવીમાં કેદ થઇ ગયો હતો. જેના આધારે કાપોદ્રા પોલીસે તપાસ હાથ ધરી બાતમીના આધારે રીઢા ચોર ભુપત ઉર્ફે ભરત કરશન વડાલીયા (ઉ.વ. 50 રહે. બારડોલી ફૂટપાથ પર રખડતો, તા. બારડોલી, જિ. સુરત અને મૂળ. અમરાપર, તા. કુકાવાવ, જિ. અમરેલી) ને ઝડપી પાડી પૂછપરછ હાથ ધરી હતી. ઉલ્લેખનીય છે કે અગાઉ વરાછા, કાપોદ્રા, ચોકબજાર, કતારગામ અને પુણા વિસ્તારમાં 26 ઠેકાણે ચોરીનો કસબ અજમાવનાર ભુપત ઉપરોકત કારખાનામાં જ રત્નકલાકાર તરીકે નોકરી કરતો હતો.

ભુપતે કારખાનાના ભાગીદાર પાસે ઉપાડ માંગ્યો હતો પરંતુ આપ્યો ન હતો. જેથી ઉપાડ નહીં આપવાની અદાવતમાં કારખાનામાં ચોરીનો કસબ અજમાવ્યો હતો અને રૂ. 1.80 લાખની ચોરીના 10 નંગ હીરા માત્ર રૂ. 25 હજારમાં મનોજ જેઠાભાઇ બાભણીયા (ઉ.વ. 30 રહે. 25, સાંઇનગર સોસાયટી, પુણા ગામ અને મૂળ. સાંજણવાવ, તા. રાજુલા, જિ. અમરેલી) ને વેચી દીધા હતા. જેથી પોલીસે હીરાના કારખાનેદાર મનોજની પણ ધરપકડ કરી હતી.