VIDEO | ગોળીની જેમ આવેલી કાર બંગાલામાં ઘૂસી ગઈ, એક્ટિવાનો કચ્ચરઘાણ વળ્યો... અમદાવાદમાં કે.કે.નગરમાં બની ઘટના

Car Accident In Ahmedabad: અમદાવાદના કે.કે. નગર વિસ્તારમાં આવેલા સિવિલ પાર્કમાં એક હોન્ડા સિટી ગાડી પૂર ઝડપે બંગલામાં ઘૂસી હોવાની ચોંકાવનારી ઘટના સામે આવી છે. કાર ચાલકે સ્ટીયરિંગ પરથી કાબૂ ગુમાવતા ગાડી સીધી એક બંગલાનો ગેટ તોડીને અડધી અંદર ઘૂસી ગઈ હતી. ટક્કર એટલી જોરદાર હતી કે, ટુ વ્હીલર અને ઘરનો મુખ્ય દરવાજો તૂટી પડ્યો હતો. આસપાસના લોકોએ એમ્બ્યુલન્સ મારફતે કારચાલકને હોસ્પિટલ ખસેડ્યા છે. બનાવના સીસીટીવી ફૂટેજ પણ સામે આવ્યા છે. 

ગોળીની જેમ આવેલી કાર બંગાલામાં ઘૂસી ગઈ

અમદાવાદના ઘાટલોડિયા વિસ્તારમાં આવેલા કે.કે. નગર રોડ પર એક ભયાનક અકસ્માતની ઘટના પ્રકાશમાં આવી છે. સિવિલ પાર્ક સોસાયટીમાં એક હોન્ડા સિટી કારના ચાલકે અચાનક સ્ટીયરિંગ પરથી કાબૂ ગુમાવતા કાર સીધી જ રસ્તાની બાજુમાં આવેલા એક બંગલામાં ધડાકાભેર ઘૂસી ગઈ હતી. આ સમગ્ર ઘટનાના સીસીટીવી ફૂટેજ પણ સામે આવ્યા છે, જેમાં જોઈ શકાય છે કે કારની ગતિ એટલી વધારે હતી કે તે બંગલાનો લોખંડનો ગેટ તોડીને અડધી અંદર સુધી ઘૂસી ગઈ હતી. અકસ્માતને પગલે આસપાસના રહીશોમાં ભારે ફફડાટ ફેલાયો હતો.

એક્ટિવાનો કચ્ચરઘાણ વળ્યો

આ ટક્કર એટલી શક્તિશાળી હતી કે, બંગલાના કમ્પાઉન્ડમાં પાર્ક કરેલા એક્ટિવા ટુ-વ્હીલરનો બુકડો બોલાઈ ગયો હતો. કાર ગેટ તોડીને આગળ વધતા ઘરના મુખ્ય દરવાજા સાથે અથડાઈ હતી, જેના કારણે દરવાજો પણ ઉખડીને નીચે પડી ગયો હતો. અકસ્માતને કારણે કારની એરબેગ્સ ખૂલી ગઈ હતી, જેના લીધે કારચાલકનો જીવ બચી ગયો હતો પરંતુ તેને શરીરના ભાગે ઈજાઓ પહોંચી હતી. સ્થાનિક લોકોએ તાત્કાલિક એમ્બ્યુલન્સ બોલાવી ઇજાગ્રસ્ત ચાલકને સારવાર માટે હોસ્પિટલ ખસેડ્યો હતો.

આ પણ વાંચો: અમદાવાદ: સોલામાં પ્રેમ સંબંધની અદાવતમાં ફિલ્મી ઢબે ફાયરિંગ અને હથોડાથી હુમલો, 3 આરોપીઓ ઝડપાયા

રસ્તા પર લાગેલા સીસીટીવીમાં દેખાય છે કે, જો આ કાર મકાનમાં ન ઘૂસી હોત તો તે સામેથી આવી રહેલી મુસાફરો ભરેલી બસ સાથે અથડાઈ હોત, જેના કારણે મોટી જાનહાનિ થવાની પૂરેપૂરી શક્યતા હતી. કાર ઘરમાં ઘૂસી જતા રસ્તા પરનો મોટો અકસ્માત ટળ્યો હતો, પરંતુ મકાન માલિકને મોટું આર્થિક નુકસાન વેઠવાનો વારો આવ્યો છે. બનાવની જાણ થતા જ સ્થાનિક પોલીસે ઘટનાસ્થળે પહોંચી પંચનામું કર્યું છે અને કારચાલક નશામાં હતો કે કેમ અથવા અન્ય કોઈ ટેકનિકલ ખામી હતી તે દિશામાં તપાસ શરૂ કરી છે.