વડોદરામાંથી હવે હેરોઇન પકડાયું, છાણીમાંથી 2.26 લાખના ડ્રગ્સ સાથે પેડલર પકડાયો : પંજાબ કનેક્શન

Vadodara Drugs Smuggling : વડોદરા શહેર પોલીસ દ્વારા ડ્રગ્સ સામે ઉપાડવામાં આવેલી ઝુંબેશ દરમિયાન સરેરાશ રોજ એક કેસ થઈ રહ્યો છે. જેનો અર્થ વડોદરામાં અનેક સ્થળે હજી પણ નશીલા દ્રવ્યોનો વેપાર ચાલી રહ્યો છે. પોલીસે ગઈ રાતે હેરોઈન સાથે એક કેરિયરને ઝડપી પાડ્યો હતો જેમાં પ્રાથમિક તપાસમાં પંજાબનું કનેક્શન ખુલ્યું છે. 

વડોદરામાં ચરસ, અફીણ અને ગાંજા જેવા નશીલા દ્રવ્યો છેલ્લા અઠવાડિયાથી રોજ પકડાઈ રહ્યા છે. ગઈ રાતે છાણી વિસ્તારના ભારત પેટ્રોલ પંપ સામેના ખુલ્લા મેદાનમાં ડ્રગ્સ વેચાઈ રહ્યું હોવાની માહિતી મળતા એસ.ઓ.જીની ટીમ ગોઠવાઈ ગઈ હતી.

પોલીસે શંકાસ્પદ હાલમાં જણાતા હરીજિન્દરસિંગ ઉર્ફે બોબી સરદાર સંતોકસિંગ ઓલખ (રુદ્રા એન્કલેવ, છાણી મારૂત હાઈટ્સ પાસે મૂળ અમૃતસર પંજાબ) ને તપાસતા તેની પાસેથી 2.26 લાખનું 11 ગ્રામથી વધુ હેરોઈન મળી આવ્યું હતું.

પોલીસે તેની પાસેથી મોબાઇલ પણ કબજે લીધો હતો. પૂછપરછ દરમિયાન અમૃતસર પાસેના જહાજગઢમાં રહેતા ગુરુ દયાળ પાસેથી આ જથ્થો ખરીદ્યો હોવાની વિગતો બહાર આવતા પોલીસે તેને પણ વોન્ટેડ જાહેર કર્યો છે.