image : Filephoto
Vadodara : વડોદરા શહેરના પશ્ચિમ વિસ્તારનો વિકાસ કુદકેને ભૂસકે વધી રહ્યો છે. પરિણામે વાહન વ્યવહારથી પણ તમામ રસ્તા ઉભરાઈ રહ્યા છે ત્યારે ગોત્રી હોસ્પિટલથી હરીનગર બ્રિજ સુધી અને નટુભાઈ સર્કલ તરફના બંને રસ્તે રીક્ષાઓમાં પેસેન્જર દર્દીઓ અને મુસાફરોને લઈ જવા માટે રીતસરની ખેંચાતાણી થાય છે. આડેધડ ઉભી રહેતી રીક્ષાઓ સહિત હોસ્પિટલમાં આવતા દર્દીઓના બહાર ઊભા રહેતા વાહનોના કારણે રોજિંદી ચક્કાજામની સ્થિતિ વચ્ચે જરૂરિયાતમંદને ટ્રાફિકમાંથી નીકળવું મુશ્કેલ બનતું હોવાનો વિડિયો સોશિયલ મીડિયામાં વાયરલ થયો હતો.
ઉલ્લેખનીય છે કે શહેરના પશ્ચિમ વિસ્તાર બાજુ વિકાસ કુદકેને ભૂસકે વધી રહ્યો છે. જોકે વાહનોની સંખ્યા પણ વધી રહી છે. આ વિસ્તારમાં આવેલી ગોત્રી જીએમઈઆરએસ હોસ્પિટલમાં સારવાર માટે દર્દીઓ આવતા હોય છે. જ્યારે બીજી બાજુ દર્દીઓને વાહનમાં લાવવા સહિત દર્દીઓ અને તેમના સગા સંબંધી પેસેન્જરોને રિક્ષામાં લાવવા-લઈ જવા માટે ચાલકો વચ્ચે રીક્ષાની ખેચાતાણી થાય છે. આડેધડ રીક્ષા પાર્કિંગ અને અન્ય વાહનોના પાર્કિંગના કારણે સતત ટ્રાફિકજામ સર્જાય છે. હરીનગર બ્રિજ સુધી અને નટુભાઈ સર્કલ સુધીના વિસ્તારમાં આ ટ્રાફિકજામ માથાના દુખાવા સમાન બન્યો છે. જો કોઈ વાહન ચાલક આવા ટ્રાફિકજામમાં અટવાઈ જાય તો તેને ટ્રાફિકમાંથી નીકળવા ભારે મથામણ કરવી પડે છે.
