Gujarat Drug Bust: એક બાજુ, કાયદામાં રહેશોમાં તો ફાયદામાં રહેશો તેવી વાતો કરાય છે તો બીજી તરફ, ડ્રગ્સ પેડલરો-ડ્રગ્સ માફિયાઓને જાણે ખાખીનો ડર રહ્યો નથી. બેરોકટોક દારૂ, ડ્રગ્સનું વેચાણ થઈ રહ્યું છે. ખુદ ગૃહ રાજ્યમંત્રી હર્ષ સંઘવીના હોમટાઉન સુરતમાંથી જ 3146 કિલો ડ્રગ્સ, અફીણ સહિત અન્ય નશીલી સિરપનો જથ્થો પકડાયો હતો. આ પરથી એ વાત પ્રસ્થાપિત થઈ કે, ગુજરાતમાં ડ્રગ્સનો કારોબાર ફૂલ્યોફાલ્યો છે.
ડ્રગ્સ પેડલરોને પકડી કાર્યવાહીનો દેખાડો કરાયો
ગાંધીના ગુજરાતમાં નશાબંધી માત્ર નામપુરતી જ રહી છે. આજે નશામુક્ત ગુજરાત નહીં પરંતુ નશાયુક્ત ગુજરાત બની રહ્યું છે. વિપક્ષના ધારાસભ્ય ઇમરાન ખેડાવાલાએ સવાલ પૂછ્યો કે, છેલ્લાં સુરત જિલ્લામાંથી કેટલું અફીણ અને અન્ય ડ્રગ્સ પકડાયું? આ સવાલના જવાબમાં ગૃહ વિભાગે એકરાર કર્યો કે, 3146 કિલો ડ્રગ્સ અને 16 કિલો અફીણનો જથ્થો પકડાયો હતો. આ ઉપરાંત 2620 નંગ સીરપની બોટલ પણ પકડાઈ હતી.
આ પણ વાંચો: ભારતમાં આતંકવાદી કાવતરું: NIAએ 6 યુક્રેનિયન 1 અમેરિકન નાગરિકની કરી ધરપકડ
વિપક્ષે એવો મુદ્દો ઉપસ્થિત કર્યો છે કે, ગૃહમંત્રીના હોમટાઉન સુરતમાંથી અફીણ અને ડ્રગ્સનો આટલો મોટો જથ્થો પકડાય તે નાની-સૂની વાત નથી. પોલીસ ડ્રગ્સ પેડલરને પકડીને વાહવાહી લૂંટે છે પણ પરંતુ આ જથ્થો ક્યાંથી આવ્યો? ડ્રગ્સ મોકલનાર ડ્રગ્સ માફિયાઓ કેમ પકડાતા નથી તે મુદ્દે ગૃહવિભાગ પાસે કોઈ જવાબ નથી. આજે ગાંધીના ગુજરાતમાં ડ્રગ્સનું દૂષણ વકરતાં યુવાધન નશાના બંધાણી બન્યાં છે ત્યારે કડક પગલાં ભરી ખરા અર્થમાં ગુજરાતને ડ્રગ્સમુક્ત બનાવે તેવી માંગ કરવામાં આવી છે.
