ગુજરાતમાં એક વર્ષમાં 11.76 લાખ બાળકોનો જન્મ, 6 વર્ષમાં સૌથી વધુ, બાળક સામે બાળકીના જન્મનું પ્રમાણ 910

ગુજરાતમાં એક વર્ષમાં 11.76 લાખ બાળકોનો જન્મ થયો છે. આમ, પ્રતિ મિનિટે સરેરાશ બે જેટલા બાળકો જન્મે છે. ગુજરાતમાં છેલ્લા 6 વર્ષમાં થયેલા આ સૌથી વધુ બાળકોનો જન્મ છે. અગાઉ 2016માં સૌથી વધુ 12.52 લાખ બાળકોનો જન્મ થયો હતો.

ગુજરાતમાં જન્મદરમાં નોંધપાત્ર સુધારો

સિવિલ રજીસ્ટ્રેશન સિસ્ટમ દ્વારા વર્ષ 2023માં જન્મેલા બાળકોની નોંધણીને આધારે અહેવાલ તૈયાર કરવામાં આવ્યો છે. ગુજરાતમાં બાળકો સામે બાળકીઓના જન્મનું પ્રમાણ 2020, 2021માં 909, 2022માં 908 જ્યારે 2023માં 910 નોંધાયું છે. આ અહેવાલ પ્રમાણે ગ્રામ્ય વિસ્તારમાં 1.47 લાખ બાળકો-1.37 લાખ બાળકી, શહેરી વિસ્તારમાં 4.68 લાખ બાળકો અને 4.23 લાખ બાળકીઓનો જન્મ થયો છે. આમ, ગુજરાતમાં એક વર્ષમાં 6.15 લાખ બાળકો-સામે 5.60 લાખ બાળકીઓનો જન્મ થયેલો છે.

આ પણ વાંચો: વડોદરાના કુંભારવાડામાં લોહિયાળ ખેલ, વહેલી સવારે યુવક પર 4 રાઉન્ડ ગોળીબાર, 4 આરોપી ઝડપાયા

જન્મદરમાં અમદાવાદ જિલ્લો સમગ્ર રાજ્યમાં મોખરે

ગુજરાતમાં જન્મ લેતા બાળકોમાંથી અમદાવાદ જિલ્લો મોખરે છે. અમદાવાદમાં એક વર્ષમાં 66,787 બાળકો અને 60,180 બાળકી એમ કુલ 1.26 લાખ બાળક જન્મ્યા છે. જેની સરખામણીએ વર્ષ 2022માં 1.24 લાખ બાળકો જન્મ્યા હતા. સૌથી વધુ બાળકોના જન્મ મામલે સુરત બીજા અને બનાસકાંઠા ત્રીજા સ્થાને છે. ગુજરાતમાં જન્મ લેતા બાળકોમાંથી 13,696ના એક વર્ષથી ઓછી ઉંમરમાં જ મૃત્યુ થયા છે. વર્ષ 2022ની સરખામણીએ વર્ષ 2023માં બાળ મૃત્યુદરમાં વધારો થયો છે. વર્ષ 2022માં 12,570, વર્ષ 2021માં 11,815 નવજાત બાળકોના મોત થયા હતા. આ, સ્થિતિએ ગુજરાતમાં દરરોજ સરેરાશ 37 નવજાત બાળકોના મૃત્યુ થાય છે.