ધોરણ-10ના પરિણામ બાદ ગુણચકાસણીની પ્રક્રિયા શરૂ: 15 મે સુધી કરી શકાશે ઓનલાઇન અરજી

GSEB SSC Result 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ, ગાંધીનગર દ્વારા માર્ચ-2026માં લેવાયેલી ધોરણ-10(SSC) અને સંસ્કૃત પ્રથમાની પરીક્ષાનું પરિણામ ગત 6 મેના રોજ જાહેર કરવામાં આવ્યું હતું. આમ જે વિદ્યાર્થીઓ પોતાના પરિણામથી સંતુષ્ટ નથી અથવા જેમને પોતાના ગુણની પુનઃ ચકાસણી કરાવવી છે, તેઓ બોર્ડની સત્તાવાર વેબસાઈટ પરથી ગુણચકાસણી માટે અરજી કરી શકશે. 

જે ઉમેદવારો ગુણચકાસણી કરાવવા ઈચ્છતા હોય તેઓએ બોર્ડની વેબસાઇટ gseb.org પર જઈને ઓનલાઇન રજીસ્ટ્રેશન કરાવવાનું રહેશે. જેમાં અરજી કરવાની પ્રક્રિયા 8 મે 2026થી શરૂ થઈ ગઈ છે અને 15મે 2026ના રોજ સાંજે 5 વાગ્યા સુધી વિદ્યાર્થીઓ ફોર્મ ભરી શકશે. ખાસ નોંધનીય છે કે, ગુણચકાસણી માટે માત્ર ઓનલાઇન માધ્યમથી જ અરજી સ્વીકારવામાં આવશે. અન્ય કોઈ પણ રીતે કરવામાં આવેલી અરજી માન્ય રાખવામાં આવશે નહીં.

અરજી માટેની નિયત ફીની ચુકવણી પણ ઓનલાઇન કરવાની રહેશે. વિદ્યાર્થીઓ SBI ePay System દ્વારા ક્રેડિટ કાર્ડ, ડેબિટ કાર્ડ અથવા નેટ બેન્કિંગના માધ્યમથી ફી ભરી શકશે. આ ઉપરાંત, જો કોઈ વિદ્યાર્થી રોકડથી ફી ભરવા માંગતા હોય, તો તેઓ "SBI Branch Payment" ઓપ્શન પસંદ કરીને દેશની કોઈપણ SBI શાખામાં ફી જમા કરાવી શકશે. બોર્ડના સચિવ દ્વારા તમામ આચાર્યઓ, વાલીઓ અને વિદ્યાર્થીઓને આ સમયમર્યાદામાં જરૂરી કાર્યવાહી પૂર્ણ કરવા જણાવવામાં આવ્યું છે.

આ પણ વાંચો: ગુજરાત બોર્ડ ધોરણ 10નું 83.86% પરિણામ જાહેર, 35508 વિદ્યાર્થીઓના A1 ગ્રેડ, સૌથી વધુ 90.85% પરિણામ સાથે નર્મદા જિલ્લો ટોચે

ધોરણ 10નું 83.86% પરિણામ 

ગત 4 મેના રોજ ધોરણ 12 સાયન્સ અને સામાન્ય પ્રવાહના પરિણામોની જાહેરાત બાદ, 6 મેના રોજ સવારે 8 કલાકે ગુજરાત બોર્ડ દ્વારા ધોરણ 10નું પરિણામ પણ જાહેર કરવામાં આવ્યું હતું. આ વખતે SSCનું કુલ 83.86% પરિણામ આવ્યું છે.