પરવાના વગર પિસ્ટલ રાખનાર જીંજરના આરોપીને 5 વર્ષની સખત કેદ અને દંડ

- નડિયાદ સેશન્સ કોર્ટનો ચુકાદો

- આરોપી દંડની રકમ ન ભરે તો વધુ 6 માસની કેદની સજાનો હુકમ, એકને શંકાનો લાભ આપી છોડી મૂકાયો

નડિયાદ : મહેમદાવાદ તાલુકાના જીંજર ગામે રહેતા એક શખ્સના ઘરેથી પોલીસે રેડ પાડતા લાયસન્સ વગરની ભારતીય બનાવટની લોખંડની પિસ્ટલ મળી આવી હતી. આ કેસમાં નડિઆદની સેશન્સ કોર્ટે આરોપીને આર્મ્સ એક્ટ હેઠળ દોષિત ઠેરવી ૫ વર્ષની સખત કેદની સજા અને કુલ રૂ.૧૦,૦૦૦ના દંડનો હુકમ કર્યો છે.

મહેમદાવાદ તાલુકાના જીંજર ગામના તોસિફમિયાં કાલુમિયાં મલેક અગાઉ નાસતા ફરતા મહંમદહુસેન ઉર્ફે ટેમ્પો મુન્નાભાઇ સિધિકભાઇ શેખના ફાર્મ હાઉસમાં મજૂરી કામ કરતો હતો. આશરે ત્રણેક વર્ષ પહેલાં મહંમદહુસેન ઉર્ફે ટેમ્પોએ એક કાળા કલરની લોખંડની દેશી પિસ્ટલ તોસિફમિયાં મલેકને આપી હતી. તોસિફમિયાંએ આ ગેરકાયદેસર પિસ્ટલ અમીનમિયાં બચુમિયાં મલેકને વેચાણ આપી હતી. અમીનમિયાંએ આ પિસ્ટલ પોતાના ઘરે તિજોરીમાં વગર લાયસન્સે છુપાવી રાખી હતી, જે બાબતે પોલીસે રેડ પાડતા આરોપી પિસ્તોલ સાથે ઝડપાઈ ગયો હતો. આ બાબતની તપાસ દરમિયાન તોસિફમિયાંની પણ ધરપકડ કરવામાં આવી હતી.  

આ બનાવ અંગે મહેમદાવાદ પોલીસે આર્મ્સ એક્ટર હેઠળ ગુનો નોધી કોર્ટમાં ચાર્જશીટ રજૂ કરી હતી. આ કેસની નડિયાદના ત્રીજા એડિશનલ સેશન્સ જજની કોર્ટમાં સુનાવણી હાથ ધરવામાં આવી હતી. આ સુનાવણી દરમિયાન સરકારી વકીલે રજૂ કરેલા ૯ દસ્તાવેજી પુરાવાઓ અને ૬ સાહેદોની મૌખિક જુબાનીઓને કોર્ટે ગ્રાહ્ય રાખી હતી. આ પુરાવાઓના આધારે કોર્ટે આરોપી અમીનમિયાં બચુમિયાં મલેક (રહે. જીંજર, મલેકવાડો, તા. મહેમદાવાદ)ને આર્મ્સ એક્ટની વિવિધ કલમો હેઠળ દોષિત જાહેર કર્યોે હતો. કોર્ટે આરોપીને આર્મ્સ એક્ટની કલમ-૨૫(૧)(ક) અને ૨૫(૧-ક) હેઠળના ગુનામાં ૫ વર્ષની સખત કેદ અને ૫,૦૦૦ રૂપિયા દંડ, તેમજ કલમ-૨૫(૧-ક-ક) હેઠળના ગુનામાં પણ ૫ વર્ષની સખત કેદ અને ૫,૦૦૦ રૂપિયાનો દંડ કર્યોે હતો. જો આરોપી દંડની રકમ ન ભરે તો વધુ ૬ માસની સખત કેદની સજા ભોગવવી પડશે તેવો હુકમ કોર્ટ દ્વારા કરવામાં આવ્યો હતો. જ્યારે અન્ય આરોપી તોસિફમિયાં મલેકને શંકાનો લાભ આપી છોડી મૂકવામાં આવ્યો હતો.