ચોરાઉ ચેઈન ખરીદનાર રાજકોટના વેપારીની પણ ધરપકડ
બે સભ્યો ભાગી જતાં શોધખોળ, કાર-રિક્ષા, રોકડ સહિત રૂા.પ.૯પ લાખનો મુદ્દામાલ કબજે
રાજકોટ: જેતપુરના બળદેવધાર વિસ્તારમાં અઠવાડિયા પહેલા રામાપીરના મંદિરના બે જોડિયા સ્તંભ ઉભા કરવાનો કાર્યક્રમ યોજાયો હતો. જેમાં ગીરદીનો લાભ લઈ એક મહિલા અને એક પુરૂષના ગળામાંથી રૂા.૪ લાખની કિંમતના સોનાના બે ચેઈનની ચોરી થઈ હતી. જેતપુર ઉદ્યોગનગર પોલીસ અને એલસીબીએ મળી આ ગુનાનો ભેદ ઉકેલી લઈ ચાર મહિલા સહિત છ સભ્યોની ટોળકીને ઝડપી લીધી છે.
આ ટોળકી પાસેથી સોનાનો ચેઈન ખરીદનાર રાજકોટના જામનગર રોડ પરની અવધ રેસીડેન્સીમાં રહેતા આશિષ જીતેન્દ્રભાઈ જોશીની પણ પોલીસે ધરપકડ કરી તેની પાસેથી રૂા.ર લાખની કિંમતનો સોનાનો ઢાળિયો કબજે કર્યો છે. આ ઉપરાંત ગુનામાં વપરાયેલી ઈકો કાર, રિક્ષા, ચાર બ્લેડ, રૂા.રપ,પ૦૦ મળી કુલ રૂા.પ.૯પ લાખનો મુદ્દામાલ પણ હસ્તગત કર્યો છે.
ઝડપાયેલા આરોપીઓમાં દિનેશ ઉર્ફે દિલો સામત સોલંકી, તેની પત્ની વિજયાબેન ઉર્ફે વીજુબેન (રહે. વીંજીવડ, તા.ગોંડલ), રમેશ ઉર્ફે જેરામ બાબુ ચુડાસમા, તેની પત્ની દૈયાબેન (રહે. બંને માલીયાસણ), શાંતીબેન કિશોર સોલંકી (રહે. ખાપટ વિસ્તાર ઝુંપડપટ્ટી, પોરબંદર) અને કિરણબેન જય સોલંકી (રહે. વીંજીવડ, તા. ગોંડલ)નો સમાવેશ થાય છે. આ ગેંગના બે સભ્યો હજુ હાથમાં આવ્યા ન હોવાથી પોલીસે શોધખોળ જારી રાખી છે.
સીસીટીવી કેમેરાના આધારે પોલીસ આ ગુનાનો ભેદ ઉકેલવામાં સફળ રહી હતી. ઝડપાયેલા આરોપીઓમાંથી એકપણનો ગુનાઈત ઈતિહાસ પોલીસને મળ્યો નથી. આ ગેંગે બીજા કોઈ ગુના આચર્યા છે કે કેમ તે અંગે પોલીસે તપાસ હાથ ધરી છે. ગેંગના સભ્યો ચેઈનની ચોરી કરવા માટે બ્લેડ, કટ્ટર વગેરેનો ઉપયોગ કરતા હતા.
