વડોદરામાં ઠગોનો કહેર : એક મહિનામાં 22 કેસ, રૂ.22 કરોડની છેતરપિંડી

Vadodara Fraud Case : વડોદરા શહેરમાં છેતરપિંડીના બનાવો ચિંતાજનક વળાંક લઈ રહ્યા છે. માત્ર એક મહિનાના ટૂંકા સમયગાળામાં પોલીસ ચોપડે વિશ્વાસઘાત અને ઠગાઈની 22 ફરિયાદો દાખલ થઈ છે. આ તમામ મામલામાં ભોગ બનેલા લોકોએ રૂ.22 કરોડથી વધુની રકમ ગુમાવી છે. 

ઠગોએ સામાન્ય નાગરિકોને ફસાવવા માટે અનેક આકર્ષક બહાનાઓ અપનાવ્યા છે. વિદેશ જવા ઇચ્છતા યુવાનોને વિઝા અપાવવાનું વચન, બેરોજગારોને ઊંચા પગારની નોકરીની લાલચ તથા રોકાણકારોને અસાધારણ વળતર મળશે તેવા સપના બતાવી છેતરવામાં આવ્યા છે. સરકારી આવાસ યોજના અંતર્ગત સસ્તા મકાન અપાવવાની ઓફર આપી પણ ભોળા લોકો પાસેથી મોટી રકમ પડાવી લેવાઈ છે.

માત્ર નોકરી કે વિઝા પૂરતી ઠગાઈ સીમિત નથી રહી. જમીન અને મિલકતના સોદામાં પણ છેતરપિંડીના કિસ્સા નોંધાયા છે. બનાવટી દસ્તાવેજો અને ખોટા વાયદા દ્વારા ખરીદ-વેચાણ કરી નિર્દોષ લોકોની મહેનતની કમાણી હડપ કરવામાં આવી છે.

આ રીતે પાથરી છેતરપિંડીની જાળ

ડિજિટલ છેતરપિંડી : એપ્લિકેશન તથા શંકાસ્પદ APK ફાઈલ મોબાઈલમાં ડાઉનલોડ કરાવી ખાતામાંથી રકમ ઉપાડી લેવામાં આવી. ટાસ્ક પૂર્ણ કરવાના નામે ઓનલાઈન રોકાણ કરાવી પૈસા ગુમાવ્યા.

નાણાકીય પ્રલોભન :  રોકાણ પર અસાધારણ વળતર મળશે તેવા સ્વપ્ના બતાવી મૂડી પડાવી લેવાઈ. દસ્તાવેજ તૈયાર કરવાના બહાને ફી વસૂલી અને પીડિતની જાણ બહાર બારોબાર લોન ઉપાડી લેવામાં આવી.

સરકારી સુવિધાનો ઢોંગ : સરકારી આવાસ યોજનામાં મકાન ફાળવવાનું તેમજ સરકારી અને ખાનગી નોકરી અપાવવાનું વચન આપી મોટી રકમ પડાવવામાં આવી.

વિદેશ અને શિક્ષણની લાલચ :  વિઝા અને વિદેશ જવાની વ્યવસ્થા કરી આપવાના નામે યુવાનો પાસેથી નાણાં ખંખેર્યા. કોલેજ પ્રવેશ અપાવવાની ખાતરી આપી વિદ્યાર્થીઓ અને વાલીઓને આર્થિક નુકસાન પહોંચાડ્યું.