જામનગરમાં સતત ત્રીજા દિવસે વીજ ચેકિંગ હાથ ધર્યું, બે દિવસમાં 40 લાખથી વધુની વીજ ચોરી પકડી

જામનગર, તા. 1 ડિસેમ્બર 2021 બુધવાર

જામનગર શહેરમાં છેલ્લા બે દિવસ દરમિયાન વીજ તંત્રએ ઓચિંતા દરોડા પાડી કેટલાક વીજજોડાણો માથી રૂપિયા 40 લાખથી વધુની વીજચોરી પકડી પાડી છે, ત્યારે આજે સતત ત્રીજા દિવસે પણ શહેરના અમુક વિસ્તારોમાં વિજ ચેકિંગ ની કાર્યવાહી ચાલુ રાખી છે, સાથોસાથ બાલાચડી સહિતના ગ્રામ્ય વિસ્તારોમાં પણ વીજ ચેકિંગ ટુકડીને ઉતારવામાં આવી છે.

જામનગર પીજીવીસીએલ વર્તુળ કચેરીની ચેકિંગ ડ્રાઇવ દ્વારા આજે ફુલ 35 વીજચેકિંગ ટુકડીને ઉતારવામાં આવી હતી. જેમાં 19 લોકલ પોલીસ, 14 એક્સ આર્મી મેન તથા ત્રણ વીડિયોગ્રાફરની મદદ લેવામાં આવી છે, અને જામનગર શહેરના ખાસ કરીને બેડી થરી પાડો વિસ્તાર, બેડી બંદર રોડ, ધરાનગર સહિતના વિસ્તારોમાં ચેકિંગ હાથ ધરવામાં આવ્યું છે.

સાથોસાથ જામનગર શહેરની આસપાસના ગ્રામ્ય વિસ્તારમાં પણ ચેકિંગ નો વ્યાપ વધારવામાં આવ્યો છે, અને સચાણા, બાલાચડી સહિતના દરિયાકિનારાના વિસ્તારોમાં પણ વિજ ચેકિંગ કરવામાં આવી રહ્યું છે જેને લઇને વીજ ચોરોમાં ફફડાટ મચી ગયો છે.