અમદાવાદ: હેબતપુરમાં વૃધ્ધ માતાને પુત્રએ પત્ની સાથે મળી મારમાર્યા: વૃદ્ધાના અન્ય પુત્રોને રેપ કેસની ધમકી

અમદાવાદ,તા.24 માર્ચ 2022,ગુરૂવાર

હેબતપુરમાં રહેતી 75 વર્ષીય વૃદ્ધાને પુત્રએ પત્ની સાથે મળીને મારમાર્યા અને જાનથી મારવાની ધમકી આપી હતી. માતાના મુદ્દે સમજાવવા આવેલા અન્ય પુત્રોને ભાભીએ અપશબ્દો બોલી રેપ કેસમાં ફસાવવાની ધમકી આપી હતી. સોલા પોલીસે બનાવ અંગે બુધવારે ગુનો દાખલ કરી તપાસ હાથ ધરી છે. 

હેબતપુર વિસ્તારમાં રહેતા વિજયાબહેનને ત્રણ પુત્ર અને પુત્રી છે. ચારે સંતાનોના લગ્ન બાદ વિજયાબહેન તેમના નાના પુત્ર વિજય સાથે રહેતા હતા. છેલ્લા 17 વર્ષથી અલગ રહેતો રિતેશ અને તેની પત્ની ચાર મહિનાથી વિજયાબહેનના મકાનમાં રહેવા આવી ગયા હતા. સાત દિવસ અગાઉ વિજયાબહેન સાથે રિતેશની પત્નીએ તકરાર કરી તેમજ અપશબ્દો બોલી હતી. આ અંગે વિજયબહેને પુત્ર રિતેશને વાત કરતા તે ઉશ્કેરાયો હતો. રિતેશે તેની પત્ની સાથે મળી માતાને અપશબ્દો બોલી મારમાર્યા તેમ ઘરમાંથી કાઢી મુકવાની અને જાનથી મારવાની ધમકી આપી હતી.

વિજયાબહેને આ અંગે તેમના અન્ય બે પુત્રોને વાત કરતા તેઓ ભાઈ રિતેશ અને ભાભીને સમજાવવા માટે ગયા હતા. જોકે ભાભીએ બન્ને ભાઈઓને અપશબ્દો બોલી ઝઘડો કરી રેપ કેસમાં ફસાવવાની ધમકી આપી હતી. આથી વિજયાબહેને પુત્ર રિતેશ અને તેની પત્ની વિરૂધ્ધ સોલા પોલીસ સ્ટેશનમાં ફરિયાદ નોંધાવી હતી. (ઘટનામાં આવતા પાત્રોના નામ બદલ્યા છે)