ચોરીના લાકડાં ટ્રેક્ટરમાં ભરી ગેરકાયદે હેરાફેરી કરાતી હોવાનું જણાવી પોલીસ કેસની ધમકી આપી રૂા. ૩૦ હજારની માગ કરનાર કહેવાતી પત્રકાર -ત્રિપુટી સામે ખેડૂતની ફરિયાદના આધારે કપુરાઈ પોલીસે ખંડણીનો નોંધી કાયદેસરની કાર્યવાહી હાથ ધરી છે.
આણંદના આંકલાવ ખાતે રહેતા વિનુભાઈ અંબાલાલ અગ્રવાલ ખેતીકામ કરે છે. એમણે ફરિયાદમાં કહ્યું કે મારા કાકા ભાનુભાઈ શનાભાઈ પઢિયાર અલગ અલગ જિલ્લાઓમાંથી કાપેલા લાકડાં ખરીદ કરી ટ્રેકટરોમાં ભરી લાકડાંની સો-મિલમાં વેચાણ કરે છે, જેમાં હું મદદ કરુ છુ. ગઈ તા.૧૩ મેએ ડભોઈના મંડાળાગામથી અમે બેટ્રેક્ટર લાકડાં ભરી સાંજે ૮ વાગ્યે વાઘોડિયા ચોકડી પાસેથી પસાર થતા હતા ત્યારે બાઈક સવાર બે શખ્સોએ અમારા બંને ટ્રેકટરોને રોક્યા હતા.
ટ્રેક્ટરોને રોકનારા જીતેન્દ્ર ડાહ્યાભાઈ પરમાર (રહે.તરસાલીગામ) અને લાલજી ભોપાભાઈ ભરવાડ (રહે. નવીનગરી, તરસાલી બાયપાસ)એ પત્રકાર તરીકે પોતાની ઓળખ આપી આ ટ્રેક્ટરમાં ગેરકાયદે લાકડાં ભરેલા છે તેમ કહી રૂા. ૧૦ હજારની માગ કરી રૂપિયા એક હજાર પડાવ્યા હતા. ત્યારબાદ તા.૧૬ મેએ મંડાળાથી લાકડાં ભરી નીકળ્યા હતા તે વખતે રાત્રે ૧૦ વાગ્યે તરસાલી બ્રિજ પાસે જીતેન્દ્ર તથા લાલજી સાથે વિજયકુમાર દેવેન્દ્રભાઈ મકવાણા (રહે. તરસાલી)એ ફરી અમારા બંને ટ્રેક્ટરો અટકાવ્યા હતા,
જેમણે બંને ટ્રેક્ટરોમાં ગોડાઉનમાંથી ચોરી કરીને લાકડાં ભરી લાવ્યા હોવાનું જણાવી પોલીસ કેસની ધમકી આપી રૂા.૩૦ હજારની માગ કરી હતી, પરંતુ એટલા રૂપિયા અમારી પાસે ન હોવાથી તેઓએ પોલીસને જાણ કરતા મામલો કપુરાઈ પોલીસ મથકે પહોંચ્યો હતો. ઉક્ત ફરિયાદના આધારે પોલીસે ફરાર જીતેન્દ્ર, લાલજી અને વિજયની શોધખોળ શરુ કરી છે.
