ટ્રેક્ટરની છાપ વાળી જૂની રૂ.5ની નોટોના મેસેજ અને રીલ વાયરલ કરી ઠગાઈ કરવાનો ભેજાબાજો દ્વારા પ્રયાસ

Vadodara Fraud Case : સોશિયલ મીડિયા પર પાંચ રૂપિયાની ટ્રેક્ટરવાળી જૂની નોટના બદલામાં રૂ.35થી 40 લાખ આપવાનો દાવો કરતી પોસ્ટ અને રીલ વાયરલ કરી સાયબર ઠગો લોકોને નિશાન બનાવી રહ્યા છે.
સાયબર એક્સપર્ટ મયુર ભુસાવળકરના જણાવ્યા મુજબ, ઠગો પહેલા ફેસબુક, ઇન્સ્ટાગ્રામ અને યુટ્યુબ પર જાહેરાતો મૂકે છે. ત્યારબાદ લિંક પર ક્લિક કરનાર વ્યક્તિને વ્હોટ્સએપ પર સંપર્ક કરીને નોટનો ફોટો મંગાવવામાં આવે છે અને લાખો રૂપિયા આપવાનો દાવો કરે છે.
તાજેતરમાં એક વૃદ્ધ વ્યક્તિ આ પ્રકારની છેતરપિંડીનો ભોગ બનતા બચી ગયા હતા. ઠગોએ રૂ.39.75 લાખ આપવાની ઓફર કરીને પહેલા રૂ.550 રજિસ્ટ્રેશન ફી ભરવા અને આધારકાર્ડ સાથે ફોટો મોકલવા કહ્યું હતું. વૃદ્ધની દીકરીને શંકા જતાં સાયબર એક્સપર્ટનો સંપર્ક કરવામાં આવ્યો હતો, જોકે ત્યાં સુધીમાં આધારકાર્ડ અને ફોટો ઠગો સુધી પહોંચી ચૂક્યા હતા.
વધુમાં જણાવ્યું હતું કે આવા દસ્તાવેજોનો ઉપયોગ કરીને ગુનેગારો ગેરકાયદે સિમકાર્ડ મેળવી શકે છે, તમારા નામે લોન લઈ શકે છે અથવા બેંક ખાતા ખોલીને અન્ય સાયબર ગુનાઓમાં તેનો ઉપયોગ કરી શકે છે. તેમણે લોકોને અજાણ્યા વ્યક્તિ સાથે કોઈપણ વ્યક્તિગત દસ્તાવેજ શેર ન કરવા, લોભામણી ઓફરોથી સાવચેત રહેવા અને કોઈપણ સાયબર છેતરપિંડીની ઘટનામાં તાત્કાલિક 1930 હેલ્પલાઇન અથવા નેશનલ સાયબર ક્રાઇમ પોર્ટલ પર ફરિયાદ કરવા અપીલ કરી છે.