Jamnagar Liquor Smuggling : જામનગર જિલ્લાના જોડીયા તાલુકાના પીઠડ ગામ ખાતે જોડિયા પોલીસે બાતમીના આધારે દરોડો પાડી ટાટા હેરિયર કારમાંથી પરપ્રાંતીય ઇંગ્લિશ દારૂનો જથ્થો ઝડપી પાડ્યો છે. પોલીસે મોરબીના બે શખ્સોની ધરપકડ કરી કુલ રૂ.13,08,302ના મુદ્દામાલ સાથે ગુનો નોંધ્યો છે.
જોડીયા પોલીસ સ્ટેશનનો સ્ટાફ પીઠડ ગામમાં વોચમાં હતો ત્યારે બાતમી મળી હતી કે એક ટાટા હેરિયર કારમાં વિદેશી દારૂનો જથ્થો લાવવામાં આવી રહ્યો છે. જેના આધારે પોલીસે પીઠડ ગામના રામમંદિર પાસે નાકાબંધી ગોઠવી હતી. દરમિયાન સફેદ રંગની ટાટા હેરિયર કારને અટકાવી તપાસ કરતા કારમાંથી "ગ્રીન લેબલ એક્સપોર્ટ સ્પેશિયલ ધ રિચ બ્લેન્ડ વ્હિસ્કી" નામની 750 એમએલની કુલ 93 બોટલ મળી આવી હતી. જેની અંદાજિત કિંમત રૂ.1,02,300 હોવાનું જાણવા મળ્યું હતું. કાર ચલાવનાર ભરતભાઈ કાનજીભાઈ ચાવડા (રહે. ઉમિયા નગર-2, રવાપર રોડ, મોરબી) તથા તેની સાથે રહેલા નિર્મલભાઈ ભગવાનજીભાઈ બરબસિયા (રહે. વાવડી રોડ, મોરબી) પાસેથી દારૂના જથ્થા અંગે કોઈ પાસ-પરમિટ મળી આવી ન હતી.
તપાસ દરમિયાન કારમાં બે સરકારી માન્ય નંબર પ્લેટ પણ મળી આવી હતી. પોલીસે વધુ તપાસ કરતા કાર પર લગાવાયેલ જીજે-18-બીએચ-3413 નંબર વાસ્તવમાં મારુતિ સુઝુકી સ્વિફ્ટ કારનો હોવાનું બહાર આવ્યું હતું, જ્યારે કબ્જે કરાયેલી ટાટા હેરિયર કારનો મૂળ નંબર જીજે-08-ડીજે-4331 હોવાનું સામે આવ્યું છે. આથી દારૂની હેરાફેરી માટે ખોટી નંબર પ્લેટનો ઉપયોગ કરવામાં આવ્યો હોવાનું પોલીસ તપાસમાં ખુલ્યું છે. પોલીસે દારૂની 93 બોટલ, રૂ.12 લાખની ટાટા હેરિયર કાર, બે મોબાઈલ ફોન તથા ખોટી નંબર પ્લેટો સહિત કુલ રૂ.13,08,302નો મુદ્દામાલ કબ્જે કર્યો છે.
પ્રાથમિક પૂછપરછમાં આરોપીઓએ આ દારૂનો જથ્થો રાજસ્થાનના સાંચોર ખાતે રહેતા મોતીલાલ નામના વ્યક્તિએ કાર સહિત મોરબીમાં પહોંચાડ્યો હોવાનું જણાવ્યું હોવાનું પોલીસ ફરિયાદમાં નોંધાયું છે. જોડીયા પોલીસે ગુનો નોંધી દારૂના સપ્લાય ચેઇન અને અન્ય સંડોવાયેલા શખ્સોની શોધખોળ હાથ ધરી છે.
