સુરત પાલિકાની નવી બોર્ડ બને તેના એક દિવસ પહેલા કતારગામમાં દબાણ હટાવાયા

Surat : સુરત પાલિકાના કતારગામઝોનમાં વેડ રોડ વિસ્તારમાં છેલ્લા ઘણા સમયથી ખાણી-પીણીની લારીઓ અને ગલ્લાના માથાભારે દબાણના કારણે રસ્તા સાંકડા બની જતા પીક અવર્સ દરમિયાન ભારે ટ્રાફિક જામ સર્જાતો હતો. વાહનચાલકો અને સ્થાનિક રહીશો રોજિંદી હાલાકીનો સામનો કરી રહ્યા હતા. અનેક ફરિયાદો બાદ આજે સુરત મહાનગરપાલિકાએ ટ્રાફિક પોલીસ બંદોબસ્ત સાથે સવારથી દબાણ હટાવ ઝુંબેશ હાથ ધરી હતી. કામગીરી દરમિયાન મોટી સંખ્યામાં લારીઓ અને ગલ્લા દૂર કરતા દબાણકર્તાઓમાં ફફડાટ ફેલાયો હતો, આ દબાણ હટાવવાની કામગીરીના કારણે હાલ પુરતી ટ્રાફિક સમસ્યા હળવી થઈ છે. 

પાલિકાના કતારગામ ઝોનમાં અનેક વિસ્તાર માથાભારે દબાણ કરનારાઓનો કબ્જો છે. પાલિકા સમયાંતરે દબાણ દુર કરે છે પરંતુ માથાભારે તત્વો ફરી દબાણ કરી દેતા હોય છે. જાહેર રસ્તા પર દબાણ થતા હોવાથી ટ્રાફિક સમસ્યા વકરી રહી છે તેની સાથે ફુટપાથ પર પણ દબાણ કરનારાઓનો કબ્જો હોય રાહદારીઓને પણ મુશ્કેલીનો સામનો કરવો પડી રહ્યો છે. 

આ દરમિયાન આજે સવારે કતારગામ ઝોનની ટીમે ટ્રાફિક પોલીસને  સાથે રાખી દબાણ હટાવવાની ઝુંબેશ શરૂ કરી હતી. શરૂઆતમાં કેટલાક દબાણકર્તાઓ વિરોધ નોંધાવ્યો હતો, પરંતુ પોલીસ જવાનોની હાજરીને કારણે પાલિકાની ટીમે મોટી સંખ્યામાં લારીઓ અને ગલ્લા દૂર કરીને રસ્તા ખુલ્લા કરાવ્યા હતા. કામગીરી દરમિયાન સમગ્ર વિસ્તારમાં ભારે ચહલપહલ જોવા મળી હતી અને દબાણકર્તાઓ માં પણ ફફડાટ વ્યાપી ગયો હતો.  

દબાણ દૂર થતાં વેડ રોડ પર વાહન વ્યવહાર સરળ બનતા વાહનચાલકોએ રાહતનો અનુભવ કર્યો હતો. સ્થાનિકોએ પાલિકાને માત્ર એક દિવસની કાર્યવાહી નહીં પરંતુ સતત દેખરેખ રાખીને ફરી દબાણ ન થાય તે માટે કડક કાર્યવાહી કરવાની માગ કરી છે.