રોડ ગંદો કરતા ડમ્પરનો પીછો કરાયો , સિંધુભવન રોડ ઉપર કપચી નાંખવા બદલ RKC ઈન્ફ્રા.ને પાંચ લાખનો દંડ

  અમદાવાદ,શનિવાર,11 ઓકટોબર,2025

અમદાવાદના કેશવબાગથી સિંધુભવન રોડ સુધી રોડ ઉપર ડામરવાળી કપચી ફેલાવી રોડ ગંદો કરવા બદલ કોર્પોરેશનના સોલિડ વેસ્ટ વિભાગ તરફથી આર.કે.સી.ઈન્ફ્રાસ્ટ્રકટર એજન્સીને રુપિયા પાંચ લાખનો દંડ સોલિડ વેસ્ટ વિભાગે ફટકારતી નોટિસ ફટકારી છે. રોડ ગંદો કરતા ડમ્પરનો વિભાગ તરફથી પીછો કરાયો હતો.૧૫ અને ૧૬ ઓકટોબરના રોજ શહેરમા મેયર કોન્ફરન્સ યોજાવાની છે તે અગાઉ વિભાગના ઈન્સપેકશન સમયે આ બાબત સામે આવી હતી.

સિંધુભવન રોડ ઉપર રોડ ઉપરથી પસાર થતા ડમ્પરો દ્વારા ડામરવાળી કપચી ફેલાવી રોડ બગાડવામા આવ્યો હોવાનુ ડેપ્યુટી મ્યુનિસિપલ કમિશનરના રાઉન્ડ સમયે બહાર આવવા પામ્યુ હતુ.જે પછી સઘન તપાસના આદેશ કરાતા સોલિડ વેસ્ટ વિભાગની ટીમ દ્વારા આર.કે.સી.ઈન્ફ્રાસ્ટ્રકચરના જજીસ બંગલા પાસે બેફામ ગતિથી હંકરાઈ રહેલા બે ડમ્પર પૈકી એક ડમ્પરને અટકાવી પુછપરછ કરાતા સ્વચ્છતા સક્વોર્ડને વાતોમા રાખી ડમ્પર ચાલકે ડમ્પર ભગાડી દેતા બીજા ડમ્પરને અટકાવીને વધુ તપાસ કરાતા રોડ બગાડનાર ડમ્પર આર.કે.સી.ઈન્ફ્રાસ્ટ્રકચરના હોવાની વિગત સામે આવતા નોટિસ સાથે દંડ ફટકારાયો હતો.