ભાજપાના પારદર્શક વહીવટના દાવાનો છેદ ઉડાવતા જિલ્લા ખેતીવાડી અધિકારી જીગર ભટ્ટ !

ભરૂચ: પૂર્વ મુખ્યમંત્રી વિજયભાઈ રૂપાણીએ પારદર્શક વહીવટ પર ભાર મુક્યો હતો. પરંતુ ભુપેન્દ્ર પટેલના કાર્યકાળ દરમિયાન આ વાત વીસરાઈ ગઈ હોય એવું લાગે છે. ભરૂચ જિલ્લા પંચાયતના અધિકારીઓ પારદર્શક વહીવટના દાવાઓના છેદ ઉડાવી રહ્યા છે. ખેતીવાડી અધિકારી પત્રકારોને માહિતી આપવામાં અખાડા કરી રહ્યા હોવાની રાવ ઉભી થઈ છે. 

પ્રાપ્ત માહિતી અનુસાર ભરૂચ જિલ્લા ખેતીવાડી અધિકારી જીગર ભટ્ટ પોતાને સવાયા ડીડીઓ સમજતા હોય તેવો ગણગણાટ સાંભળવા મળ્યો છે. એક બાજુ સરકારના મંત્રીઓ, મુખ્યમંત્રી અને  જિલ્લા પંચાયતના અધિકારી-પદાધિકારી પારદર્શક વહીવટની ગુલબાંગો ફેંકે છે બીજુ બાજુ ભટ્ટ લોકો સુધી ઝડપી અને સાચી માહિતી પહોંચે તેમાં રોડા નાંખી રહ્યા છે. પ્રજા સમક્ષ સાચુ ચિત્ર પ્રસ્તુત થાય તે માટે જો કોઈ પત્રકાર માહિતી માંગે તો તેમની સાથે ઉધ્ધતાઈ ભર્યુ વર્તન કરી વિગતો આપવામાં અખાડા કરતાં હોવાની બુમ ઉઠી છે. હાલમાં કમોસમી વરસાદ વરસી રહ્યો છે. ત્યારે જિલ્લામાં કેટલા હેક્ટર જમીનમાં કયો કયો શિયાળુ પાક છે તેવી સામાન્ય માહિતી આપવામાં પણ ભટ્ટને પેટમાં દુ:ખે છે. આ આંકડા ખેતીવાડી કચેરીમાં ઉપલબ્ધ હોય છે. એક ક્લીકમાં આંકડા કાઢીને પત્રકારો સુધી પહોંચાડી શકાય છે. પરંતુ આ માટે માહિતી અધિકારના કાયદોનો ઉપયોગ કરવાનું જણાવી 30 દિવસમાં માહિતી આપીશું તેમ કહીં ભટ્ટ દ્વારા અવળચંડાઈ કરાઈ રહી છે. ખેતીવાડી અધિકારી પાસે આંકડાકીય માહિતી ન હોવાના કારણે તેને તૈયાર કરવા માટે સમય મળે એટલે માહિતી આપવામાં અખાડા કરાતા હોવાની વાત ઉઠી રહી છે. ત્યારે આ મામલે જિલ્લા વિકાસ અધિકારી આંકડાકીય માહિતી મેળવી જિલ્લા માહિતી કચેરીનાં માધ્યમથી અથવા જિલ્લા પંચાયતની ઓફિસિયલ વેબસાઈટ દ્વારા વિગતો પત્રકારોને ઉપલબ્ધ કરાવે તેવી માંગ ઉઠી છે.

જિલ્લા પંચાયતની વેબસાઈટ ઉપર 2013-14 પછી પાકની વિગતો અપડેટ જ નથી થઈ !

ભરૂચ: માહિતી આપવામાં અખાડા કરતા જિલ્લા ખેતીવાડી અધિકારી પાસે આંકડાકીય માહિતી જ નથી તેનો પુરાવો જિલ્લા પંચાયતની વેબસાઈટ પરથી મળી રહ્યો છે. ખેતીવાડી શાખાની કામગીરી અને પાક અંગેની માહિતી તપાસતા છેલ્લે  વર્ષ 2013-14માં પાકની માહિતી અપડેટ થઈ છે. ત્યારપછી સાત વર્ષથી જિલ્લામાં કેટલા હેક્ટર જમીનમાં કેટલો પાક થયો છે તેની માહિતી અપડેટ થઈ નથી.