વડોદરા,સાયબર ફ્રોડના નાણાની હેરાફેરી માટે મ્યુલ બેન્ક એકાઉન્ટ ખોલાવી તેની કીટ કમિશન લઇને આગળ આપી દેનાર આરોપીને જે.પી.રોડ પોલીસે ઝડપી પાડયો છે. આરોપી પાસેથી ૨૩ બેન્ક એકાઉન્ટની પાસબુક તથા ૨૬ ડેબિટ કાર્ડ સહિતની સામગ્રી પોલીસે કબજે લીધી છે.
જે.પી. રોડ પોલીસે મળેલી માહિતીના આધારે તાંદલજા કિસ્મત ચોકડી પાસે લેન્ડ માર્ક ગેલેક્સીમાં રહેતા એજાજ ફીરોજમીંયા અરબ ( મૂળ રહે. રીફાઇ એપાર્ટમેન્ટ, મેમણ કોલોની, આજવારોડ)ને મ્યુલ બેન્ક એકાઉન્ટના દસ્તાવેજો સાથે ઝડપી પાડયો હતો. પોલીસે તેની પૂછપરછ કરતા એવી વિગતો જાણવા મળી હતી કે, વડોદરાના આજુબાજુના ગામડાઓમાં ઓછું ભણેલા લોકોના એકાઉન્ટ ખોલાવી તેઓની પાસેથી સીમકાર્ડ સહિતની બેન્કની કીટ લઇ લીધી હતી. તે લોકોને એવું જણાવતો હતો કે, હું અદીશ બેગ નામની કંપનીનો પ્રોપરાઇટર છું. ટ્રેડિંગના રૃપિયા એકાઉન્ટમાં ટ્રાન્સફર કરવામાં આવશે. જ્યારે અન્ય કીટ નાહીદ બંજારા (રહે. કિસ્મત ચોકડી), અજહર લાકડાવાલા તથા ફરહાન પટેલ (બંને રહે. ભરૃચ) પાસેથી લીધી હતી. આ પાસબુક અનીસ ઉસ્માનભાઇ કાની (રહે. મદીના પાર્ક, બાયપાસ રોડ) ને આપવા માટે પોતાની પાસે રાખી હતી. અનીસ કાની તે કીટ પેટે ૨૦ હજાર રૃપિયા આપતો હતો. એજાજ પોતાનું પાંચ હજાર કમિશન લઇ બાકીના રૃપિયા એકાઉન્ટ ધારક અને તેને એકાઉન્ટની કીટ આપનારને આપી દેતો હતો. અનીસ કાનીએ કેટલીક પાસબુક થોડા સમય પછી પરત કરી દેતો હતો.અત્યારસુધી તેણે ૯૦ કરતા વધુ બેન્ક એકાઉન્ટ અનીસ કાનીને છેલ્લા ૧ વર્ષમાં આપ્યા છે.
