ગેંગના આઠ સભ્યોની ક્રાઇમ બ્રાંચ દ્વારા ધરપકડ
સૂત્રધાર શામજી મકા સહિત ચાર આરોપીઓ ફરાર, છ માસમાં છ ગુજસીટોકમાં 81 આરોપીઓની ધરપકડ
રાજકોટ: ધી ગુજરાત કન્ટ્રોલ ઓફ ટેરેરિઝમ એન્ડ ઓર્ગેનાઇઝ્ડ ક્રાઇમ એક્ટ એટલે કે ગુજસીટોક હેઠળ રાજકોટ ક્રાઇમ બ્રાંચે થોરાળા વિસ્તારની નામચીન શામજી મકા ગેંગના ૧૨ સભ્યો સામે ગુનો દાખલ કરી ૮ સભ્યોની ધરપકડ કરી છે. જોકે મુખ્ય સુત્રધાર શામજી સહિતનાં ચાર આરોપીઓ ફરાર છે. જેમની શોધખોળ જારી રખાઇ છે.
૨૦૧૬થી ૨૦૨૫ દરમિયાન શામજી મકા ગેંગ સામે ખૂન, ખૂનની કોશિષ, ગંભીર ઇજાઓ, અપહરણ, લૂંટ, ગેરકાયદે મંડળી રચી હુમલા કરવા, સરકારી અધિકારીની ફરજમાં રૂકાવટ સહિતનાં ૩૭ ગુના નોંધાયા હતા. જેમાંથી ૨૨ ગંભીર ગુના ગુજસીટોકની વ્યાખ્યામાં આવતા હોવાથી ક્રાઇમ બ્રાંચના એસીપી બી.બી.બસીયા, ફર્સ્ટ પીઆઇ એમ.આર.ગોંડલીયા અને પીએસઆઇ ચંદ્રસિંહ જાડેજાએ દરખાસ્ત તૈયાર કરી હતી.
હાલમાં ગેંગનાં આઠ સભ્યોની ધરપકડ કરવામાં આવી છે. જેમાં દેવશી મકાભાઇ મકવાણા, દિલીપ ઉર્ફે દિલો પ્રેમજી ચૌહાણ, ચિરાગ ઉર્ફે ભયલુ શામજી મકવાણા, કિરણ મોહનભાઇ ખીમસુરીય, અજય રાજુભાઇ જાદવ, ગૌતમ ઉર્ફે ગોગો ધરમભાઇ બારૈયા, નાગેશ ઉર્ફે લાલો શામજી મકવાણા અને મેહુલ કનુભાઇ સોલંકીનો સમાવેશ થાય છે. આ તમામ આરોપીઓ થોરાળા વિસ્તારમાં રહે છે.
છેલ્લા છ માસમાં ક્રાઇમ બ્રાંચે છ ગેંગ સામે ગુજસીટોક હેઠળ ગુનો નોંધી કુલ ૮૧ આરોપીઓની ધરપકડ કરી છે. હજુ પણ બે ગેંગ સામે ગુજસીટોક હેઠળ પગલાં તોળાઇ રહ્યાની માહિતી મળી છે. આ ઉપરાંત પણ બીજી કોઇ ગેંગ ગુજસીટોકની વ્યાખ્યામાં આવે છે કે કેમ તે અંગે ક્રાઇમ બ્રાંચે તપાસ જારી રાખી છે.
શામજી મકાની ગેંગ સામે ગુજસીટોક બાદ તપાસનીશ અધિકારી આ ગેંગની મિલ્કતો ટાંચમાં લેવાની પણ કાર્યવાહી કરશે. ગમે તે રીતે શામજી મકાને ગંધ આવી જતાં ભાગી ગયો છે. જેની ક્રાઇમ બ્રાંચે શોધખોળ જારી રાખી છે.
- રાજકોટમાં પાંચ વર્ષમાં 10 ગેંગ સામે ગુજસીટોક
રાજકોટ: શહેરમાં છેલ્લા પાંચ વર્ષ દરમિયાન કુલ ૧૦ ગેંગ સામે ગુજસીટોક હેઠળ ગુનો નોંધાયો છે. ૨૦૨૦ની સાલમાં પ્ર.નગર અને થોરાળા વિસ્તારમાં બે ગેંગ સામે ગુજસીટોક હેઠળ ગુનો નોંધાયો હતો. ક્રાઇમ બ્રાંચના ડીસીપી જગદીશ બાંગરવાના કાર્યકાળ દરમિયાન છેલ્લા છ જ માસમાં છ ગેંગ સામે ક્રાઇમ બ્રાંચ દ્વારા ગુજસીટોક હેઠળ ગુનો નોંધાયો છે. જેમાં મુરગા, પેંડા, બાટલી, ઓડીયા, ઇભલા અને શામજી મકા ગેંગનો સમાવેશ થાય છે. હજુ બે ગેંગ ક્રાઇમ બ્રાંચના રડારમાં છે. ગુજસીટોકનાં ગુનાની તપાસ લાંબી ચાલે છે. જેને કારણે દસમાંથી આજ સુધીમાં બે કેસમાં ચાર્જશીટ થયું છે. બાકીના કેટલાક કેસોમાં હજુ પણ તપાસ ચાલું છે.
