ખાડોદરા અને ભૂવા ઉત્સવ પદયાત્રા યોજી કોંગ્રેસનો અનોખો વિરોધ

વડોદરા શહેર કોંગ્રેસ સમિતિએ રસ્તા પરના ખાડા અને ભૂવાની સમસ્યાને લઈ અકોટા વિવાન્તા હોટેલથી મુજમહુડા સુધી ખાડોદરા અને ભૂવા ઉત્સવ પદયાત્રા યોજી હતી. જેમાં કાઉન્સિલરો, ફ્રન્ટલ સેલ પ્રમુખો, વોર્ડ પ્રમુખો અને અનેક કાર્યકરો જોડાયા હતા.

કોંગ્રેસ પ્રમુખે આક્ષેપ કર્યો હતો કે, વડોદરા ભૂવા નગરી બની ગયું છે. તંત્ર રસ્તા બનાવવા પાછળ લાખો કરોડો રૂપિયાનો ખર્ચ કરે છે. છતાં ઘણા રસ્તાઓ ખખડધજ બનવા સાથે ઠેર ઠેર ભૂવા પડી રહ્યા છે. જેના કારણે નાગરિકોને મુશ્કેલી વેઠવાનો વખત આવે છે. ખાડાને કારણે અકસ્માતો અને જાનહાનિના બનાવો વધી રહ્યા છે. કોર્પોરેશનના કામચલાઉ કોન્ટ્રાક્ટરોની હલકી ગુણવત્તાવાળી કામગીરી આ માટે જવાબદાર છે. દિવાળી પર શણગાર અને લાઈટિંગ માટે કરોડો રૂપિયાનો ખર્ચ કરતી કોર્પોરેશન રસ્તાઓની સમસ્યાઓ પ્રત્યે ઉદાસીન છે. પદયાત્રા દરમિયાન કાર્યકરોએ મચ્છરોની નગરી, ભૂવા નગરી, ખાડોદરા જેવા બેનરો સાથે સૂત્રોચારો કરી વિરોધ દર્શાવ્યો હતો. અને આ સમસ્યાનો ઉકેલ ન આવે તો આવનારા દિવસોમાં આંદોલન વધુ ઉગ્ર બનશે તેવી ચીમકી ઉચ્ચારી હતી. વધુમાં ડ્રેનેજ, કચરો કલેક્શન, સ્મશાન ખાનગીકરણ, ફાયરબ્રિગેડ સાધનોની ખરીદી સહિતના કામોમાં ભ્રષ્ટાચારના આક્ષેપ કર્યા હતા. અત્રે યાદ અપાવવું જરૂરી છે કે, અકોટા-મુજમહુડા રોડ પર વારંવાર ભૂવા પડવાના બનાવો બની રહ્યા છે. આ રોડ પર ૪ દિવસમાં બે વિશાળ ભૂવા પડ્યા છે.