આજે કોંગ્રેસના ધારાસભ્યોની બેઠક, વિધાનસભા ચૂંટણીની ચર્ચા

આજે કોંગ્રેસ સભ્ય નોંધણી અભિયાન શરૂ  કરશે

આગામી દિવસોમાં ભાજપ સરકાર સામે લડત લડવા આંદોલનાત્મક કાર્યક્રમો ઘડવામાં આવશે

અમદાવાદ : ગુજરાત કોંગ્રેસના ધારાસભ્યોની એક બેઠક રવિવારે મળવા જઇ રહી છે. પ્રદેશ પ્રભારી ડો.રઘુ શર્માના વડપણ હેઠળ મળનારી આ બેઠકમાં આગામી વિધાનસભાની ચૂંટણી મુદદે રણનીતિ ઘડવા ચર્ચા કરાશે. આ ઉપરાંત કોંગ્રેસ રવિવારથી સભ્ય નોંધણી અભિયાનનો પ્રારંભ કરશે.

રવિવારે અમદાવાદ શહેરમાં ગુજરાત પ્રદેશ કોંગ્રેસ સમિતીએ બપોરે દોઢ વાગે કોંગ્રેસના ધારાસભ્યો ઉપરાંત શહેર જિલ્લા પ્રમુખ,નગરપાલિકા-તાલુકાના પ્રમુખની બેઠક મળનાર છે.

સૂત્રોના મતે, આ બેઠકમાં આગામી દિવસોમાં ભાજપ સરકાર સામે મોંઘવારીથી માંડીને અન્ય મુદ્દાઓને લઇને પ્રજા વચ્ચે જવા આંદોલનાત્મક કાર્યક્રમ ઘડવામાં આવશે. આ વખતે કોંગ્રેસે કાર્યકરોને કયા કયા મુદ્દાઓને લઇને  આંદોલનાત્મક કાર્યક્રમ કરવા તે અંગે તાલીમ આપવા ય નક્કી કરાયુ છે. આ બેઠકમાં અમદાવાદમાં યોજાનારી ચિંતન શિબિરને લઇને પણ ચર્ચા કરવામાં આવનાર છે. 

ખાસ કરીને સભ્ય નોંધણી અભિયાનને વેગવંતુ જ નહી, અસરકારક રીતે અમલ થાય તે માટે પણ કોંગ્રેસે આયોજન કર્યુ છે. ઉલ્લેખનીય છેકે, ગત વખતે સભ્ય નોંધણી માટે ધારાસભ્યોથી માંડીને સંગઠનના પદાિધકારીઓએ કોઇ ધ્યાન જ આપ્યુ ન હતુ જેથી આ મામલે છેક હાઇકમાન્ડ સુધી ફરિયાદો પહોચી હતી.