કપુરાઈ વિસ્તારનો રસ્તો ખુલ્લો કરવા 5 મકાનોની કમ્પાઉન્ડ વોલનો સફાયો

Vadodara Corporation : વડોદરા શહેરના છેવાડે વિસ્તારમાં આવેલી ટીપી 40માં આદિત્ય પેરેડાઇઝ બંગલોથી 12 મીટરના 90 મીટર જોડતા ખુલ્લા કરવાના રસ્તામાં અડચણરૂપ અને ગેરકાયદે બનેલા પાંચ મકાનોની કમ્પાઉન્ડ વોલ પર પાલિકાની દબાણ શાખાના બુલડોઝર ફરી વળતા ટીપીનો આ રસ્તો ખુલ્લો કરાયો હતો. 

શહેરના છેવાડે વિસ્તારમાં કપૂરાઈ ટીપી 40માં આદિત્ય પેરેડાઇઝ બંગલોથી 12 મીટરનો રસ્તો ખુલ્લો કરવાનો હતો. આ અંગે તપાસ દરમિયાન 90 મીટર જેટલા રોડ રસ્તા પર પાંચ જેટલા મકાનોની ગેરકાયદે કમ્પાઉન્ડ હોવાનું બહાર આવ્યું હતું. આ અંગે પાલિકા તંત્ર દ્વારા શરૂ કરાયેલી કાર્યવાહી અગાઉ ઘટના સ્થળે કોઈ અઘટિત બનાવ બનતો રોકવા માટે મેડિકલ ટીમ, વીજ નિગમ ટીમ, ફાયરની ટીમ, તથા સ્થાનિક પોલીસ કાફલો અને એસઆરપી કાયદો વ્યવસ્થા જાળવવા ખડે પગે રખાઈ હતી. દબાણ શાખા દ્વારા ટીપી 40 અંગે આદિત્ય પેરેડાઇઝ બંગ્લોઝથી 12 મીટરના રસ્તો ખુલ્લો કરવા માટે અંદાજિત 90 મીટરની જગ્યામાં બનેલા રહેણાંક પાંચ મકાનોની ગેરકાયદે બનાવવામાં આવેલી કમ્પાઉન્ડ વોલ પર બુલડોઝર ફેરવી દેવાયું હતું. આ વખતે સ્થાનિકોના ટોળેટોળા દબાણ શાખાની કાર્યવાહી જોવા માટે ઉમટયા હતા. પરંતુ ઘટના સ્થળે મોજૂદ પોલીસ કાફલાએ અને એસઆરપી જવાનોએ સંયમ દાખવીને ઘટના સ્થળેથી તમામને ખદેડયા હતા.