RTOમાં મનપસંદ નંબર મેળવવા લાખોનો ખર્ચ, જાણો કેટલામાં વેચાયો ‘1’ નંબર

અમદાવાદ,બુધવાર

ગ્રાહકો મોંઘીદાટ કે વૈભવી ગાડીઓ ખરીદ કરે પછી જ્યારે પોતાના મનપસંદ લકી કે શુકનવંતા નંબરની વાત આવે ત્યારે તેઓ આરટીઓમાંથી મનપસંદ નંબર મેળવવા ગમે તેટલા રૂપિયા ખર્ચીને પણ તે નંબર મેળવી જ રહેતા હોય છે. છેલ્લા કેટલાક વર્ષોમાં ખાસ કરીને ફોર વ્હીલર વાહનની પસંદગીનો નંબર મેળવવાનો ક્રેઝ નોંધનીય રીતે વધ્યો છે. તમને જાણીને આશ્ચર્ય થશે કે, મોંઘીદાટ કારોમાં પોતાના લકી કે પસંદગીનો નંબર મેળવવા અમદાવાદીઓ લાખો રૂપિયા ખર્ચતા હોય છે. અમદાવાદ આરટીઓમાં આજે જ ફોર વ્હીલર માટે થયેલી નવી સિરીઝની ઓનલાઇન હરાજીમાં 1157 વાહન માલિકોએ ભાગ લીધો હતો. જેમાં એક કાર માલિકે તેની કારનો 1 નંબર મેળવવા માટે રૂ. 24.70 લાખની બહુ ઊંચી બોલી લગાવી નંબર પોતાના નામે કર્યો હતો. બીજીબાજુ, આરટીઓ તંત્રને આ હરાજીથી એક જ દિવસમાં રૂ. 1.15 કરોડથી વધુની આવક થઈ છે.

નવી સિરીઝની ઓનલાઇન હરાજીમાં 1157 વાહન માલિકે ભાગ લીધો

અમદાવાદ આરટીઓ દ્વારા ફોર વ્હીલર વાહનની જી.જે.-01 ઝેડ સી નવી સિરીઝ બહાર પાડી હતી. જેમાં પોતાનો લકી મનપસંદ નંબર મેળવવા માટે તા. 6 જૂનથી તા. 8 સુધીમાં કુલ 1,157 વાહન માલિકોએ ફોર્મ ભર્યા હતા. જેમાં ખાસ કરીને ફેન્સી ગોલ્ડ નંબર માટે ઓછામાં ઓછા 40,000 તથા સિલ્વર નંબર માટે રૂ. 25,000 ભરવાના હતા. જ્યારે અન્ય નંબરો માટે 8,000 ભરવાના હતા. જે નંબરો માટે આજે તા. 10 જૂન સાંજે 4 વાગ્યા સુધી ઓનલાઇન હરાજી શરૂ થઈ હતી.

કારના 1 નંબર માટે 24.70 લાખની બોલી, RTOને કુલ 1.15 કરોડની આવક

આજે સાંજે 4 વાગ્યા સુધીમાં 1,157 વાહન માલિકો દ્વારા ઓનલાઇન હરાજીમાં ભાગ લઈને બોલી બોલવામાં આવતી હતી. આશ્ચર્યની વાત તો એ છે કે કારની સિરીઝનો 1 નંબર મેળવવા માટે કાર માલિકે સૌથી વધારે રૂ. 24.70 લાખ બોલીને નંબર પોતાના નામે કર્યો હતો. જ્યારે 11 નંબર માટે 4.46 લાખ અને 7 નંબર માટે રૂ. 5.57 લાખ, 999 માટે રૂ. 2.75 લાખ તેમજ 50 નંબર માટે રૂ. 1.55 લાખ તથા 9 નંબર માટે 91 હજાર અને 5000 નંબર માટે રૂ. 99 હજાર ઉપરાંત 10 નંબર મેળવવા માટે રૂ. 70 હજારની બોલી બોલવામાં આવી હતી. આમ, એક જ દિવસમાં વાહનની નવી સિરીઝ માટે આરટીઓ તંત્રને રૂ. 1.15 કરોડની આવક થઈ હતી.