યુનિ.સત્તાધીશો સામે પ્રોફેસરની 133 સહિત અધ્યાપકોની 794 જગ્યાઓ ભરવાનો પડકાર

વડોદરાઃ એમ.એસ.યુનિવર્સિટી સત્તાધીશોએ અધ્યાપકોની કાયમી ભરતી માટેનું જાહેરનામુ બહાર પાડી દીધું છે.જેમાં અપાયેલી જાણકારી પ્રમાણે યુનિવર્સિટી સત્તાધીશોએ પ્રોફેસરની ૧૩૬ પોસ્ટ સહિત અધ્યાપકોની કુલ ૭૯૪ પોસ્ટ ભરવાની થાય છે.જેમાં એસોસિએટ પ્રોફેસરોની ૨૦૨ તથા આસિસ્ટન્ટ પ્રોફેસરોની ૪૫૯ જગ્યાઓ ખાલી છે.

સત્તાધીશો માટે આટલી મોટી સંખ્યામાં પોસ્ટ ભરવાની કામગીરી પડકારજનક બનવાની છે.મળતી વિગતો પ્રમાણે ૨૦૧૯ પછી ભરતી નહીં થઈ હોવાથી ખાલી જગ્યાઓનો રાફડો ફાટયો છે અને તેમાં પણ સાયન્સ અને ટેકનોલોજી ફેકલ્ટીને તેની સૌથી વધારે અસર થઈ છે.

ટેકનોલોજી ફેકલ્ટીમાં અધ્યાપકોની ૨૧૪ અને સાયન્સ ફેકલ્ટીમાં ૧૪૧ પોસ્ટ ભરવાની થાય છે.આ બંને ફેકલ્ટીઓમાં જ સૌથી વધારે  જગ્યાઓ ખાલી પડી છે.ટેકનોલોજી ફેકલ્ટીમાં તો પ્રોફેસર કેટેગરીની ૫૭ જગ્યાઓ ખાલી છે.સૂત્રોના કહેવા પ્રમાણે ૨૦૧૯માં અધવચ્ચેથી બંધ કરાયેલી ભરતીના બેકલોગને ગણતરીમાં લેવામાં આવે તો ખાલી જગ્યાઓમાં રિઝર્વ કેટેગરીની  જગ્યાઓ ૫૦ ટકા કરતા વધારે છે.જાહેરનામા પ્રમાણે  ઉમેદવારો યુનિવર્સિટીની વેબસાઈટ પર રિક્રુટમેન્ટ સેક્શનમાં તા.૧૦ એપ્રિલથી તા.૧૫ મે સુધી ઓનલાઈન અરજી કરી શકશે.એ પછી અરજીઓની ચકાસણી હાથ ધરાશે.ચકાસણી બાદ લાયકાત ધરાવતા ઉમેદવારોના ઈન્ટરવ્યૂ શરુ થશે.

ટેકનોલોજીમાં અધ્યાપકોને ડેઝિગ્નેશન આપવાના બાકી 

ટેકનોલોજી ફેકલ્ટીમાં એક તરફ સૌથી વધારે જગ્યાઓ ખાલી છે તો બીજી તરફ આ ફેકલ્ટીમાં અધ્યાપકોને  ડેઝિગ્નેશન આપવાની માગણી હજી સુધી સંતોષાઈ નથી.અધ્યાપકોને પ્રમોશન મળી ગયા છે, તેમને એ પ્રમાણે પગાર ધોરણ પણ મળી ગયું પણ પ્રોફેસર કે આસિસ્ટન્ટ પ્રોફેસર તરીકેનું ડેઝિગ્નેશન આપવાની માગણી હજી પણ અધ્ધરતાલ છે.તાજેતરમાં આ મુદ્દે અધ્યાપકોએ રજૂઆત પણ કરી હતી.આમ છતા સત્તાધીશોએ તેના પર ધ્યાન આપ્યું નથી અને બીજી તરફ ખાલી જગ્યાઓ પર ભરતીની જાહેરાત કરાઈ છે.

પોલીટેકનિકમાં એસો.પ્રોફેસરની પોસ્ટ જાહેર થતા વિવાદ

ભરતી માટે નોટિફિકેશન જાહેર થતાની સાથે જ પોલીટેકનિકમાં વિવાદ સર્જાયો છે.સૂત્રોનું કહેવું છે કે, પોલીટેકનિકમાં એસોસિએટ પ્રોફેસર તરીકે કોઈ હોદ્દો જ નથી.આમ છતા ભરતીમાં આ કેટેગરીમાં નવ પોસ્ટ દર્શાવવામાં આવી છે.ઉપરાંત આ જ ઉમેદવારોની હેડ તરીકે નિમણૂક થશે તેવી સ્પષ્ટતા કરાઈ છે.ખરેખર તો પોલીટેકનિકમાં સરકારે માત્ર લેકચરરની જ પોસ્ટ મંજૂર કરી છે અને તેમાંથી જ સિનિયોરિટીના આધારે જે તે વિભાગમાં અત્યાર સુધી હેડની નિમણૂક થતી આવી છે.

ફેકલ્ટી પ્રમાણે ખાલી જગ્યાઓ

ફેકલ્ટી પ્રોફેસર  એસો.પ્રોફેસર આસી.પ્રોફેસર

કોમર્સ ૮ ૯ ૨૮

આર્ટસ ૧૭ ૨૮ ૬૦

સંસ્કૃત મહાવિદ્યાલય ૬

સોશ્યલ વર્ક ૩ ૨ ૫

લો ૨ ૧ ૧

મેનેજમેન્ટ ૫ ૫ ૧

સાયન્સ ૨૦ ૩૪ ૮૭

હોમસાયન્સ ૭ ૬ ૪૧

ફાઈન આર્ટસ ૫ ૭ ૧૬

પોલીટેકનિક ૯ ૮૬

પાદરા કોલેજ ૧૦

એજ્યુકેશન ૪ ૧૨ ૧૮

જર્નાલિઝમ ૧ ૧

ફાર્મસી ૫ ૫ ૧

ટેકનોલોજી ૫૭ ૮૩ ૭૪

પરફોર્મિંગ આર્ટસ ૩ ૨ ૨૪