આજથી CBSE બોર્ડ પરીક્ષાનો પ્રારંભ, 46 લાખથી વધુ વિદ્યાર્થીઓ આપશે પરીક્ષા

CBSE Board Exam 2026 Starts Today: સેન્ટ્રલ બોર્ડ ઓફ સેકન્ડરી એજ્યુકેશન દ્વારા આજથી ધોરણ 10 અને 12ની બોર્ડની પરીક્ષાઓનો દેશભરમાં પ્રારંભ થયો છે. આ વર્ષે ભારત સહિત વિશ્વના 26 દેશોમાંથી કુલ 46 લાખથી વધુ વિદ્યાર્થીઓ પરીક્ષામાં બેસવાના છે. ગુજરાતની વાત કરીએ તો, રાજ્યભરમાંથી અંદાજે 80 હજારથી વધુ વિદ્યાર્થીઓ આ પરીક્ષા આપી રહ્યા છે. શિક્ષણ બોર્ડ દ્વારા પરીક્ષાના સુચારુ સંચાલન માટે તમામ તૈયારીઓ પૂર્ણ કરી લેવામાં આવી છે અને દેશ-વિદેશમાં હજારો પરીક્ષા કેન્દ્રો ફાળવવામાં આવ્યા છે.

પરીક્ષા સવારે 10:30 વાગ્યે શરૂ થશે, પરંતુ વિદ્યાર્થીઓએ સમયનું ચુસ્તપણે પાલન કરવાનું રહેશે. પરીક્ષા કેન્દ્રો પર વિદ્યાર્થીઓને સવારે 9:00 વાગ્યાથી પ્રવેશ આપવાની પ્રક્રિયા શરૂ કરી દેવામાં આવી હતી. નોંધનીય છે કે સવારે 10:00 વાગ્યા પછી કોઈ પણ વિદ્યાર્થીને કેન્દ્રમાં પ્રવેશ આપવામાં આવશે નહીં. પરીક્ષા ખંડમાં 10:15 વાગ્યે પ્રશ્નપત્ર આપવામાં આવશે, જેથી વિદ્યાર્થીઓને પેપર વાંચવા માટે 15 મિનિટનો વધારાનો સમય મળી રહે અને તેઓ શાંતિથી પરીક્ષા આપી શકે.