ઓનલાઇન ઠગાઈના અનેક પ્રકારના કિસ્સાઓ બની રહ્યા છે ત્યારે વડોદરાના એક ટ્રેડર સાથે સરકારી વેબસાઈટ પર એકાઉન્ટ બનાવી છેતરપિંડી કરવાનો કિસ્સો સામે આવ્યો છે.
ગોરવાની સેમી સોસાયટીમાં રહેતા અને 25 વર્ષથી ઈમ્પોર્ટ એક્સપોર્ટ નું કામ કરતા દીપેન શિંગાળાએ પોલીસને કહ્યું છે કે, એક્સપોર્ટ કરતા વેપારીઓને થતા લાભો માટે ભારતના કસ્ટમ એન્ડ એક્સાઇઝ વિભાગની આઈસગેટ વેબસાઈટ પર રજીસ્ટ્રેશન કરવાનું હોય છે. વર્ષ 2021 થી મારા ખાતામાં તેના લાભની રકમ જમા થતી હતી.
આ પોર્ટલ ઉપર સપ્ટેમ્બર 2025 માં મારું રજીસ્ટ્રેશન કરાવવાનું બાકી હતું ત્યારે થોડા સમય પહેલા તપાસ કરાવતા મારા નામનું એકાઉન્ટ અગાઉથી જ બનેલું હોવાનું જાણવા મળ્યું હતું. જેથી વધુ વિગતો મેળવતા કોઈ વ્યક્તિએ મારા પાસવર્ડ આઇડી બદલીને એકાઉન્ટ બનાવી 8.12 લાખની ક્રેડિટ તેના ખાતામાં ટ્રાન્સફર કરી દીધી હોવાની માહિતી જાણવા મળી હતી. જેથી સાયબર સેલ દ્વારા ગુનો નોંધી તપાસ હાથ ધરવામાં આવી છે.
