વડોદરામાં ડભોઇ રોડ પર કાર ચાલકે ટ્રાફિક પોલીસ જવાનને 800 મીટર સુધી ઢસડ્યો

Vadodara : વડોદરા ટ્રાફિક પોલીસે ગઈકાલે બ્લેક ફિલ્મ તથા નંબર પ્લેટ વગરના વાહન ચાલકો વિરુદ્ધ સ્પેશિયલ ડ્રાઈવનું આયોજન કર્યું હતું. ટ્રાફિક પોલીસનો સ્ટાફ ગઈકાલે સોમવાર ચાર રસ્તા પાસે પોઇન્ટ પર ટ્રાફિક નિયમનની કામગીરી કરતો હતો તે દરમિયાન એક સફેદ કલરની ઇકો કારના ચાલક કપુરાઈ ચોકડીથી આવતો હતો અને તેની કારમાં બ્લેક ફિલ્મ લગાવેલી હતી. પોલીસે કાર ઉભી રખાવતા ડ્રાઈવરે ગાડી ધીમી કરી હતી. તે દરમિયાન પોલીસે ઈશારાથી ગાડી સાઈડમાં પાર્ક કરવાનું કહેતા ડ્રાઈવરે ડભોઇ ત્રણ રસ્તા તરફ પુરપાટ ઝડપે હંકારી હતી. તે વેળાએ પોલીસનો જમણો હાથ કારના દરવાજામાં ફસાઈ ગયો હતો. જેથી કર્મચારીએ દરવાજો પકડી લીધો હતો અને ગાડી પર લટકી ગયો હતો. ડ્રાઇવરે પોતાની કાર ડભોઇ ત્રણ રસ્તા જવા દીધી હતી. પોલીસ કર્મચારીએ વારંવાર તેને ગાડી ઉભી રાખવાનું કહેવા છતાં ડ્રાઈવરે ગાડી ઊભી રાખી ન હતી અને 800 મીટર સુધી ઢસડી ગયો હતો.

ટ્રાફિક જવાને જણાવ્યું હતું કે તેણે પહેરેલા બુટ તૂટી ગયા હતા. અને પગના ભાગે ઇજા થઈ હતી. ડ્રાઇવરે ગણેશ નગર ત્રણ રસ્તા પાસે કાર ઊભી રાખતા હું તરત જ મારું કડું દરવાજાના લોકમાંથી કાઢી લીધું હતું. ડ્રાઇવરને ગાડીમાંથી નીચે ઉતારવાનું કરતાં તે નીચે ઉતરી રોંગ સાઈડ પર દોડવા લાગ્યો હતો. સ્ટાફે તેને પાછળ દોડી પકડી લીધો હતો અને ગાડી પાસે લઈ આવ્યા હતા. ડ્રાઇવરે પોતાનું નામ અતુલભાઇ રણછોડભાઈ રાઠવા (રહે-મહાકાળીનગર વૈકુંઠ સોસાયટીની સોસાયટી સામે વાઘોડિયા રોડ)જણાવ્યું હતું અને તેની પાસે ડ્રાઇવિંગ લાયસન્સ પણ ન હતું.