પિતા પર હુમલો કરી ભાઈના રૂમમાં આગ લગાવીને ઘરવખરી ફૂંકી મારી

- નડિયાદના નવા બિલોદરામાં નશાખોર પુત્રનો આતંક

- નડિયાદ રૂરલ પોલીસે પિતાની ફરિયાદના આધારે પુત્રની ધરપકડ કરી ગુનો નોંધી કાર્યવાહી હાથ ધરી

નડિયાદ : નડિયાદ મહાનગરપાલિકાના નવા બિલોદરા વિસ્તારમાં નશાની લતે ચઢેલા પુત્રએ નિવૃત્ત પિતા અને માતા સાથે ઝઘડો કરી હુમલો કર્યો હતો. ઉશ્કેેરાયેલા પુત્રએ મોટા ભાઈના રૂમમાં આગ ચાંપતા ટીવી અને કબાટ સહિતનો સામાન બળીને ખાખ થઈ ગયો હતો. નડિયાદ રૂરલ પોલીસે પિતાની ફરિયાદના આધારે ગુનો નોંધી આરોપી પુત્રની ધરપકડ કરી વધુ કાર્યવાહી હાથ ધરી છે.

નડિયાદ મહાનગરપાલિકા વિસ્તારમાં આવેલા નવા બિલોદરાના કર્મવીર નગર ૫-માં રહેતા પ્રદીપકુમાર મનુભાઈ ભટ્ટ અમદાવાદ પોલીસ કમિશનર કચેરીમાં જુનિયર ક્લાર્ક તરીકે નિવૃત્ત થયા છે. તેઓ પત્ની ભાવનાબેન અને બે પુત્રો સુનીલ અને ધામક સાથે રહે છે. મોટો પુત્ર સુનીલ અમદાવાદમાં ખાનગી નોકરી કરે છે, જ્યારે નાનો પુત્ર ધામક બેરોજગાર છે. ધામક અવારનવાર નશાની હાલતમાં ઘરના સભ્યો સાથે ઝઘડો કરી ત્રાસ ગુજારતો હોવાની વિગતો બહાર આવી છે. ગત ૧૭ માર્ચના રોજ રાત્રિના સમયે ધામક નશો કરીને ઘરે આવ્યો હતો અને પરિવાર સાથે ગાળાગાળી કરવા લાગ્યો હતો. આ દરમિયાન પિતાએ તેને ગાળો બોલવાની મનાઈ કરતા ધામક ઉશ્કેરાઈ ગયો હતો અને પિતાનું ગળું પકડી તેમને ગડદાપાટુનો માર મારવા લાગ્યો હતો. પતિને બચાવવા વચ્ચે પડેલા માતા ભાવનાબેન પર પણ તેણે હુમલો કર્યો હતો. 

ત્યારબાદ ધામકે તેના મોટા ભાઈ સુનીલના રૂમમાં જઈ અંદરથી દરવાજો બંધ કરી દીધો હતો. પરિવારે દરવાજો ખોલવા વિનંતી કરી છતાં તેણે અંદરથી વજનદાર વસ્તુ પછાડીને દરવાજો તોડી નાખ્યો હતો અને બિભત્સ ચેનચાળા કરવા લાગ્યો હતો. આવેશમાં આવી જઈને ધામકે માચીસ વડે રૂમમાં પડેલા પૂંઠાના બોક્સમાં આગ ચાંપી દીધી હતી. રૂમમાંથી ધુમાડાના ગોટેગોટા નીકળતા જોઈ પરિવારે બૂમાબૂમ કરી હતી, પરંતુ ધામકે જાનથી મારી નાખવાની ધમકી આપી અંદરનો સામાન સળગાવવાનું ચાલુ રાખ્યું હતું. આખરે પરિવારે ૧૧૨ હેલ્પલાઈન પર જાણ કરતા નડિયાદ રૂરલ પોલીસ તાત્કાલિક ઘટનાસ્થળે પહોંચી હતી અને ધામકને રૂમમાંથી બહાર કાઢી અટકાયત કરી હતી. આ આગમાં સુનીલ અને તેની પત્નીના કપડાં, ટીવી, પંખો અને લાકડાનો કબાટ બળી જતાં અંદાજે ૭૦,૦૦૦થી ૭૫,૦૦૦ રૂપિયાનું નુકસાન થયું છે. પોલીસે પિતાની ફરિયાદના આધારે ધામક વિરુદ્ધ વિવિધ કલમો હેઠળ ગુનો નોંધી વધુ તપાસ શરૂ કરી છે.