Animal Cruelty in Chhota Udepur: છોટાઉદેપુર જિલ્લાના બોડેલી ટાઉનમાં છેલ્લા બે દિવસથી પશુઓ પર ક્રૂરતાની એક સનસનાટીભરી ઘટના સામે આવી છે. કોઈ અજાણ્યા ઈસમ દ્વારા ધારદાર હથિયારનો ઉપયોગ કરીને રખડતી ગાયોને નિશાન બનાવવામાં આવી રહી છે, જેના કારણે અત્યાર સુધીમાં 8 જેટલી ગાય ગંભીર રીતે ઘાયલ થઈ છે.
ગાયોના પેટના ભાગે 5-6 ઈંચના ઘા
પ્રાપ્ત માહિતી અનુસાર, આ અજાણ્યો શખ્સ રોડ પર રખડતી ગાયોના પેટના ભાગે 5 થી 6 ઇંચ જેટલો ઊંડો ઘા મારીને તેમને લોહીલુહાણ કરી રહ્યો છે. આ ક્રૂર ઘટનાની જાણ થતાં જ બોડેલી પોલીસ તાત્કાલિક હરકતમાં આવી હતી. બોડેલી પોલીસે ઘાયલ અને લોહીલુહાણ હાલતમાં પડેલી ગાયોને શોધીને તેમને તાત્કાલિક સારવાર માટે પશુ ચિકિત્સક પાસે મોકલી આપી હતી, જેથી તેમનો જીવ બચાવી શકાય.
આરોપીને શોધવા પોલીસની ટીમો મેદાનમાં
આ ક્રૂર કૃત્ય કરનારા તત્વોને ઝડપી પાડવા માટે બોડેલી પોલીસ દ્વારા અલગ અલગ ટીમો બનાવવામાં આવી છે. બોડેલી ટાઉનના તમામ વિસ્તારોના સી.સી.ટીવી ફૂટેજની સઘન તપાસ શરૂ કરવામાં આવી છે અને પોલીસ દ્વારા વિસ્તારમાં કડક વોચ ગોઠવી દેવામાં આવી છે.બોડેલીના પી.આઈ. વી.એસ. ગાવિતએ આ સમગ્ર મામલે તપાસ ચાલી રહી હોવાની પુષ્ટિ કરી છે અને જણાવ્યું છે કે આરોપીને વહેલી તકે પકડી પાડવા માટેના તમામ પ્રયાસો કરવામાં આવી રહ્યા છે.
લોકોમાં રોષ અને ન્યાયની માંગ
આ ઘૃણાસ્પદ ઘટનાને કારણે સ્થાનિક લોકોમાં ભારે રોષ જોવા મળી રહ્યો છે. લોકોએ આવા ક્રૂર તત્વોને વહેલી તકે શોધી કાઢીને જેલના સળિયા પાછળ ધકેલી દેવા માટે સખત માંગણી કરી છે, જેથી ભવિષ્યમાં આવા કૃત્યોનું પુનરાવર્તન ન થાય. પોલીસ આ અજાણ્યા ઈસમને ઝડપી પાડવા માટે સતત પ્રયત્નશીલ છે અને ટૂંક સમયમાં જ આરોપી પકડાઈ જશે તેવી આશા વ્યક્ત કરવામાં આવી રહી છે.
