અમરેલી: વડીયાના મોરવાડા નજીક બાઈક સાથે અથડાયેલી રીક્ષામાંથી દેશી દારૂ ભરેલા કોથળા રોડ પર વિખેરાયા

Rickshaw Bike Crash In Amreli: અમરેલી જિલ્લાના વડિયા તાલુકાના મોરવાડા ગામ નજીક અકસ્માતની ઘટના સામે આવી છે. અહીં એક પેસેન્જર રિક્ષા અને બાઈક વચ્ચે સર્જાયેલા અકસ્માત બાદ રિક્ષામાં છુપાવેલો દેશી દારૂનો જથ્થો રોડ પર વિખેરાઈ જતા પોલીસ તંત્ર દોડતું થયું હતું.

અકસ્માતે ખોલી રિક્ષાચાલકની પોલ

મળતી માહિતી અનુસાર, વડિયાના મોરવાડા નજીક એક પુરપાટ ઝડપે જતી પેસેન્જર રિક્ષા અને મોટરસાયકલ વચ્ચે જોરદાર ટક્કર થઈ હતી. અકસ્માત થતાની સાથે જ રિક્ષામાંથી દેશી દારૂ ભરેલા કોથળાઓ બહાર ફેંકાયા હતા અને દારૂના પોટલા રસ્તા પર વિખેરાઈ ગયા હતા. પેસેન્જર રિક્ષાનો ઉપયોગ દારૂની હેરાફેરી માટે થતો હોવાનું જોઈને રસ્તે પસાર થતા લોકોના ટોળા ઉમટી પડ્યા હતા.

આ પણ વાંચો: અમરેલી: ધારીના પ્રેમપરા પાસે ભયાનક અકસ્માત, કાર અચાનક પલટી ખાઇ જતા એકનું મોત, બે ઈજાગ્રસ્ત

ઈજાગ્રસ્ત બાઈક ચાલક સારવાર હેઠળ

આ અકસ્માતમાં બાઈક ચાલકને ગંભીર ઈજાઓ પહોંચતા તાત્કાલિક 108 એમ્બ્યુલન્સ મારફતે સારવાર અર્થે હોસ્પિટલ ખસેડવામાં આવ્યા છે. બીજી તરફ, ઘટનાની જાણ થતા વડિયા પોલીસનો કાફલો તાત્કાલિક સ્થળ પર પહોંચી ગયો હતો અને દારૂનો જથ્થો કબજે કરવાની કામગીરી હાથ ધરી હતી.

વડિયા પોલીસે દારૂ ભરેલી રિક્ષા જપ્ત કરી છે અને રિક્ષાચાલકને પોલીસ મથકે લઈ જવામાં આવ્યો છે. પોલીસે રિક્ષાચાલક સામે પ્રોહિબિશન એક્ટ અને અકસ્માત અંગેની વિવિધ કલમો હેઠળ ગુનો નોંધવાની તજવીજ હાથ ધરી છે. પોલીસ હવે એ દિશામાં પણ તપાસ કરી રહી છે કે આ દેશી દારૂનો જથ્થો ક્યાંથી લાવવામાં આવ્યો હતો અને કોને પહોંચાડવાનો હતો.