અમરેલીના શિક્ષકે અંગ્રેજીનો ભય દૂર કર્યો: માત્ર 130 શબ્દોના ચાર્ટથી વિદ્યાર્થીઓ માટે ‘ઇંગ્લિશ લર્ન થયું ઇઝી’

Amreli News : મોટાભાગના વિદ્યાર્થીઓ ખાસ કરીને ગ્રામીણ વિસ્તારના અંગ્રેજી ભાષા શીખવાથી ડરતા હોય છે. પરંતુ અમરેલી જિલ્લાની હરીપુરા પ્રાથમિક શાળાના શિક્ષક હિમાંશુ જોષીએ આ સમસ્યાનો અનોખો ઉકેલ શોધી કાઢ્યો છે. તેમણે માત્ર 130 શબ્દોનો એક ખાસ ચાર્ટ બનાવીને અને નવીન શિક્ષણ પદ્ધતિ અપનાવીને વિદ્યાર્થીઓમાં અંગ્રેજી પ્રત્યેની રુચિ જગાડી છે.

નવીન પદ્ધતિ અને ક્રિયાત્મક શિક્ષણ

શિક્ષક હિમાંશુ જોષી માને છે કે, શિક્ષકનું કામ માત્ર ભણાવવાનું નથી, પણ વિદ્યાર્થીઓને શીખવા માટે પ્રેરિત કરવાનું છે. આ માટે તેમણે એક ક્રિયાત્મક સંશોધન કર્યું. તેમણે એવા 130 શબ્દોનો ચાર્ટ તૈયાર કર્યો જે અંગ્રેજી વાક્યો બનાવવા માટે સૌથી વધુ ઉપયોગમાં લેવાય છે. વિદ્યાર્થીઓને દરરોજ માત્ર બે જ શબ્દો પાકા કરવાનું કહેવામાં આવે છે, જેથી તેમને આ કામ બોજારૂપ ન લાગે.

વર્ગખંડમાં વિદ્યાર્થીઓ વધુ બોલે અને સક્રિય રહે તે માટે તેમણે રમતોનો ઉપયોગ કર્યો. તેઓ ઉદાહરણ આપતા કહે છે કે, જો વર્ગખંડ વૃક્ષ નીચે બેસાડવામાં આવે તો વૃક્ષના થડ, ડાળી, પાન, ફળ જેવા દરેક ભાગ માટે અંગ્રેજી શબ્દો શીખવી શકાય છે. આ પ્રત્યક્ષ શિક્ષણ પદ્ધતિથી વિદ્યાર્થીઓને શબ્દો સરળતાથી યાદ રહી જાય છે.

પરિણામ: ભયમુક્ત શિક્ષણ અને સન્માન

આ નવીન શિક્ષણ પદ્ધતિના પરિણામે વિદ્યાર્થીઓમાં અંગ્રેજીનો ભય દૂર થયો છે. તેઓ હવે જાતે જ અંગ્રેજીમાં રમતો રમવાની, કાળ વચ્ચેનો તફાવત સમજવાની અને શિષ્ટ શબ્દો બોલવાની વાત કરે છે. તેમના ભાષા કૌશલ્યમાં નોંધપાત્ર સુધારો જોવા મળ્યો છે.

આ પણ વાંચો: દેવાયત ખવડની મૂશ્કેલી વધી! મારામારી કેસમાં વેરાવળ સેશન્સ કોર્ટે 7 દિવસના રિમાન્ડ મંજૂર કર્યા, જામીન પણ રદ

હિમાંશુ જોષીના આ પ્રયોગને ધ્યાનમાં રાખીને તાજેતરમાં 5 સપ્ટેમ્બરના રાષ્ટ્રીય શિક્ષક દિવસ નિમિત્તે તેમને અમરેલી તાલુકાના શ્રેષ્ઠ શિક્ષક તરીકેનું સન્માન પણ મળ્યું છે. તેમનું કહેવું છે કે, વિદ્યાર્થીઓને શિક્ષકનો ડર ન હોવો જોઈએ અને તેમના પ્રશ્નો દબાઈ ન જાય તેની ખાસ કાળજી રાખવી જોઈએ. ગુજરાત સરકાર પણ આ પ્રકારના એક્ટિવિટી-બેઝ્ડ શિક્ષણ પર ભાર મૂકી રહી છે, અને બેગલેસ ડે જેવી પહેલોથી શાળાઓનું વાતાવરણ વધુ આનંદમય બન્યું છે.