AMC Election: 50%થી ઓછું મતદાન હોવા છતાં ભાજપ કેવી રીતે જીત્યું? જાણો જીતનું અસલી ગણિત

Ahmedabad Local Body Election Results 2026 | અમદાવાદ મ્યુનિસિપલ કોર્પોરેશનમાં સતત પાંચમી ટર્મમાં ભાજપ સત્તાસ્થાને રહેશે. 48 વોર્ડની 192 બેઠક માટે યોજાયેલી ચૂંટણીમાં મંગળવારે જાહેર થયેલા પરિણામોમાં 38 વોર્ડમાં ભાજપની પેનલ જીતી હતી જ્યારે 7 વોર્ડમાં કોંગ્રેસની પેનલનો વિજય થયો હતો. ભાજપને 192 બેઠકમાંથી 160 બેઠક જ્યારે કોંગ્રેસને 32 બેઠકો મળી હતી. આમ, 2021ની ચૂંટણીની સરખામણીએ ભાજપને 1 જ્યારે કોંગ્રેસને 8 બેઠકનો ફાયદો થયો હતો.

ભાજપમાં પૂનમની ચાંદની, કોંગ્રેસમાં અમાસના અંધારા: 30 વર્ષના શાસન પછી પણ એન્ટી-ઈન્કમ્બન્સી દેખાઈ નથી.

50 ટકાથી ઓછા મતદાન વાળા 24 વોર્ડ: આ વોર્ડમાં ભાજપે 75 બેઠકો જીતી છે.

સંઘ-પરિષદનું પ્રભુત્વ ઘટ્યું: ભાજપના વિજેતા ઉમેદવારોમાં સંઘ અને વિશ્વ હિન્દુ પરિષદ સાથે જોડાયેલા કાર્યકરોની સંખ્યામાં આ વખતે ઘટાડો નોંધાયો છે.

અમદાવાદ મ્યુનિસિપલ કોર્પોરેશન (AMC) માં ભાજપે સતત પાંચમી વખત સત્તા જાળવી રાખીને ઇતિહાસ રચ્યો છે. 48 વોર્ડની 192 બેઠકો માટે યોજાયેલી આ જંગમાં ભાજપે 160 બેઠકો કબજે કરી છે. જોકે, આ વખતે કોંગ્રેસે પણ ગત ચૂંટણી કરતા સુધારો કરીને 32 બેઠકો મેળવી છે.

વોર્ડ મુજબનું ગણિત

કુલ 48 વોર્ડમાંથી 38 વોર્ડમાં ભાજપની આખી પેનલ વિજેતા બની છે, જ્યારે કોંગ્રેસે 7 વોર્ડમાં પોતાની પેનલ જીતાડવામાં સફળતા મેળવી છે. કુબેરનગર જેવા વોર્ડમાં ઓ.બી.સી. અનામત ફેક્ટરને કારણે રસપ્રદ પરિણામો જોવા મળ્યા છે, જ્યાં કોંગ્રેસની ત્રણ મહિલા ઉમેદવારો વિજેતા બની છે.

સમગ્ર ગુજરાતમાં ભાજપનો દબદબો

માત્ર અમદાવાદ જ નહીં, પણ દક્ષિણ અને મધ્ય ગુજરાતમાં પણ ભાજપનો વિજય રથ અટક્યો નથી. મધ્ય ગુજરાતમાં ભાજપે 1154 બેઠકો જીતીને વિપક્ષના સૂપડા સાફ કરી દીધા છે. સુરત, નવસારી અને વાપીમાં પણ ભાજપનું શાસન અકબંધ રહ્યું છે.

ઓછા મતદાને પણ ભાજપને ફળ્યું

આશ્ચર્યજનક રીતે, જે 24 વોર્ડમાં 50% કરતા પણ ઓછું મતદાન થયું હતું, ત્યાં ભાજપે 75 બેઠકો જીતી છે. આ દર્શાવે છે કે ભાજપનું કેડર બેઝ્ડ વોટિંગ ખૂબ જ મજબૂત રહ્યું છે.