અમદાવાદ: વીએચપીના કાર્યકરે પત્નીને ઢોર માર માર્યો, રાણીપ પોલીસે કરી ધરપકડ

Domestic Violence In Ahmedabad: અમદાવાદના રાણીપ વિસ્તારમાં પારિવારિક હિંસાની એક ચોંકાવનારી ઘટના સામે આવી છે. વ્યાજનો ધંધો કરતા અને વિશ્વ હિન્દુ પરિષદ (VHP)ના કાર્યકર અમિત નામના શખસે પોતાની જ પત્ની અને 17 વર્ષીય દીકરી પર જીવલેણ હુમલો કરી ઢોર માર માર્યો હતો. ગંભીર રીતે ઈજાગ્રસ્ત મહિલાને સારવાર અર્થે સિવિલ હોસ્પિટલમાં ખસેડવામાં આવી છે, જ્યારે પોલીસે ત્વરિત કાર્યવાહી કરી આરોપી પતિની ધરપકડ કરી લીધી છે.

પૈસાની ઉઘરાણી કરતા પતિ પિત્તો ગુમાવ્યો

મળતી માહિતી અનુસાર, આ વિવાદની શરૂઆત ઉછીના લીધેલા રૂપિયાની માંગણીથી થઈ હતી. પીડિતાના જણાવ્યા અનુસાર, તેના પતિ અમિતે તેના ફઈ પાસેથી અંદાજે 15થી 20 લાખ રૂપિયા લીધા હતા. જ્યારે પીડિતાનો ભાઈ આ પૈસાની ઉઘરાણી કરવા ઘરે આવ્યો, ત્યારે અમિત ઉશ્કેરાઈ ગયો હતો અને પરિવારને ગાળો ભાંડી ઘરમાંથી બહાર કાઢી મૂક્યા હતા. ત્યારબાદ આવેશમાં આવી ગયેલા અમિતે ઘરમાં રહેલા મેટલના શો-પીસ અને બેટ વડે પત્ની પર હુમલો કર્યો હતો.

પતિના હુમલામાં પત્નીના માથાના ભાગે ગંભીર ઈજાઓ પહોંચી હતી. આ લોહીલુહાણ દ્રશ્યો જોઈ 17 વર્ષીય દીકરી તેની માતાને બચાવવા વચ્ચે પડી હતી, પરંતુ પિતાએ તેને પણ ઢોર માર માર્યો હતો. અંતે દીકરીએ હિંમત દાખવી પોલીસને જાણ કરતા આરોપી અમિત ત્યાંથી ફરાર થઈ ગયો હતો. ઈજાગ્રસ્ત મહિલાને તાત્કાલિક સિવિલ હોસ્પિટલ પહોંચાડવામાં આવી હતી, જ્યાં તેની હાલત સ્થિર હોવાનું જાણવા મળ્યું છે.

આ પણ વાંચો: અમદાવાદમાં નવા વાડજમાં પરિણીતાનો છઠ્ઠા માળેથી કૂદીને આપઘાત, પતિના ત્રાસથી કંટાળીને જીવન ટૂંકાવ્યું

દહેજ, મિલકત પચાવી પાડવા અને બીજા લગ્નનો આક્ષેપ

પીડિત મહિલાએ પોલીસ સમક્ષ ગંભીર આક્ષેપો કર્યા છે. તેમણે જણાવ્યું કે, 'પતિ અમિત, સાસુ અને જેઠ છેલ્લા ઘણાં સમયથી માનસિક અને શારીરિક ત્રાસ આપી રહ્યા છે. પતિએ બીજા લગ્ન પણ કરી લીધા છે અને મારા પિયરમાંથી મળેલું દહેજ, ચાંદીની દુકાન તેમજ મારા નામના મકાનો વેચીને પૈસા પચાવી પાડ્યા છે. અગાઉ પણ મને બે વખત આપઘાત કરવા માટે પણ મજબૂર કરવામાં આવી હતી.'

રાણીપ પોલીસે મહિલાની ફરિયાદના આધારે ગુનો નોંધી ગણતરીના કલાકોમાં જ આરોપી અમિતની ધરપકડ કરી લીધી છે. પોલીસ હવે મહિલાનું વિગતવાર નિવેદન નોંધી રહી છે અને પીડિતાએ રજૂ કરેલા મારામારીના વીડિયો તેમજ ફોટાના પુરાવાઓના આધારે તપાસ તેજ કરી છે.