Fake App Investment Scam: અમદાવાદના શીલજ વિસ્તારમાં રહેતા એક 71 વર્ષીય સિનિયર સિટીઝન સાયબર ગુનેગારોની મોટી ઠગાઈનો ભોગ બન્યા છે. શેરબજારમાં રોકાણ કરવાની ટિપ્સ આપવાના બહાને વિશ્વાસમાં લઈને અને IPOમાં ઊંચા વળતરની લાલચ આપીને સાયબર ક્રિમિનલ્સે તેમની સાથે રૂપિયા 1.65 કરોડની છેતરપિંડી આચરી છે. આ અંગે અમદાવાદ રેન્જના સાયબર સેલ દ્વારા ગુનો નોંધીને કાયદેસરની તપાસ હાથ ધરવામાં આવી છે.
થોડા મહિના પહેલાં દિનેશભાઈના વોટ્સએપ પર એક અજાણ્યા નંબર પરથી મેસેજ આવ્યો હતો, જેમાં એક કંપની દ્વારા શેરબજારમાં રોકાણ કરવા અંગેની ટિપ્સ આપવાની વાત કહેવામાં આવી હતી. દિનેશભાઈએ સહમતી દર્શાવતા તેમને રોકાણ અંગેની માહિતી મોકલવાનું શરૂ કરાયું હતું. થોડા દિવસો પછી, તેમને એક વોટ્સએપ ગ્રૂપમાં ઉમેરીને 'કોટક સિક્યોરિટીઝ'ના નામે એક નકલી એપ્લિકેશન મોકલવામાં આવી હતી અને તેમાં રજીસ્ટ્રેશન કરાવીને IPOમાં ઊંચા વળતરની ખાતરી આપવામાં આવી હતી.
આ જાળમાં આવીને તેમણે અલગ-અલગ સમયે ભારત અને દુબઈથી કુલ રૂપિયા 1.65 કરોડનું રોકાણ કર્યું હતું. એપ્લિકેશનમાં રોકાણની રકમ સાથે કુલ રૂપિયા 2.83 કરોડનો નફો દર્શાવવામાં આવતો હતો. જોકે, જ્યારે તેમણે આ નાણાં ઉપાડવાનો પ્રયત્ન કર્યો ત્યારે તે વિડ્રો થતા નહોતા. થોડીવાર બાદ તેમની પ્રોફાઇલ ડિટેઇલમાં એક IPO માટે રૂપિયા 4.39 કરોડની રકમ ભરવાની પ્રક્રિયા બતાવવામાં આવી હતી. આ માટે ઠગોએ રૂપિયા 2.83 કરોડનો નફો બાદ આપીને, બાકીના તફાવત પેટે બીજા રૂપિયા 1.53 કરોડ જમા કરાવવા માટે દબાણ કર્યું હતું.
પરંતુ, આટલી મોટી રકમ ન હોવાથી તેમણે આ IPOમાં રોકાણ કરવાની ના પાડી દીધી હતી. તેમ છતાં, આરોપીઓએ રૂપિયા 2.83 કરોડની રકમ ડિમેટ એકાઉન્ટમાંથી પરત મેળવવા માટે વધુ રૂપિયા 10 લાખની માંગણી કરી હતી. આથી દિનેશભાઈને શંકા ગઈ અને તપાસ કરતાં માલૂમ પડ્યું કે 'કોટક સિક્યોરિટીઝ'ના નામે નકલી એપ બનાવીને તેમની સાથે છેતરપિંડી થઈ છે. તેમણે સામેના નંબરો પર ફોન કરવાનો પ્રયાસ કર્યો પરંતુ ઠગોએ ફોન ઉપાડવાનું બંધ કરી દીધું હતું. આ અંગે તેમણે પોલીસ ફરિયાદ નોંધાવતા, પોલીસે ટેકનિકલ એનાલિસિસના આધારે ગુનો નોંધીને વધુ તપાસ શરૂ કરી છે.
